Haxhiu tha se opozita po dëshiron t’i lëshojmë pe Vuçiqit, i reagon Çitaku nga PDK: Kurti po mundohet ta personalizojë situatën

Tensionet e ditës së shtunë në veri të vendit nxitën reagime të shumta në Kosovë. Ministrja e Drejtësisë Albulena Haxhiu në lidhje me këtë tha se vendimet e Qeverisë janë të drejta dhe legjitime, ndërsa të turpshme dhe për keqardhje i quajti qëndrimet e opozitës në këtë rast.

Haxhiu përmes një shkrimi në rrjetin social Facebook tha se opozita në Kosovë po dëshirojnë që t’i lëshojmë pe Serbisë dhe t’i përmbushin apetitet e Vuçiqit.

“Vendimet e Qeverisë janë të drejta dhe të ligjshme. Qëllimi i tyre është mbrojtja e sovranitetit dhe integritetit territorial prandaj edhe do të duhej të kishte unifikim rreth tyre. Janë për keqardhje dhe të turpshme qëndrimet e subjekteve opozitare. Fatkeqësisht opozita e sotme apo qeveria e djeshme as atëherë as tash nuk mbështesin vendimet e drejta, madje sot vuajmë pasojat e marrëveshjeve të tyre të dëmshme. Ata duan që t’i lëshojmë pe Serbisë e të përmbushen apetitet e Vuçiqit, disa për shkak të lidhjeve me strukturat kriminale e disa të tjerë e kanë mendjen veç tek pushteti”, shkroi Haxhiu në Facebook.

Ndërsa për këtë deklaratë ministres Haxhiu nga opozita i ka reaguar nënkryetarja e PDK-së, Vlora Çitaku. Ajo tha se kjo Qeveri është pronare e vendimeve dhe gabimeve dhe se kryeministri Kurti po e personalizon situatën e krijuar.

“Ministrja e Drejtësise sulmon opozitën.  Kryeministri personalizon krizën e krijuar.  E nderuara Qeveri, nga kriza me sindikatat deri tek kriza në marrëdhëniet me aleatë, ju jeni pronarë të (pa)vendimeve. Por edhe gabimeve.  Diskursi përçarës i ndihmon vetëm armiqtë e Kosovës”, tha Çitaku.

Ndërkaq, tensionet u shtuan pasi Lista Serbe deklaroi se do të largohet nga institucionet e Kosovës për shkak të vendimit të Qeverisë së Kosovës për targat. Pas vendimit – të marrë në një takim me dyer të mbyllura në Zveçan – dorëheqje dhanë edhe pjesëtarët serbë të Policisë së Kosovës, ata të gjyqësorit dhe prokurorisë në veri. /Telegrafi/