Gramoz Vokrri reagon pasi Komisioni i FFK-së rrëzoi kandidaturën e tij për kryetar

Komisioni i Federatës së Futbollit të Kosovës (FFK) për aplikimet e kandidaturave e ka refuzuar sot (e mërkurë) kandidaturën e Gramoz Vokrrit, i cili sipas këtij komisioni, ka pasur probleme me disa nga nënshkrimet e prezantuara.

Në anën tjetër, FFK e ka aprovuar kandidaturën e presidentit aktual, Agim Ademi.

Lidhur me Vokrrin, Federata ka sqaruar se vendimi është marrë në bazë të nënshkrimeve të siguruara, për të cilat spekulohet se disa janë të kontestueshme.

Pas kësaj kumtese nga FFK ka ardhur reagimi i Gramoz Vokrrit, i cili ka thënë se ky vendim “tregon qartë tendencën e kundër kandidatit për të eliminuar me çdo kusht konkurrencën dhe frymën demokratike të këtij procesi”.

Lexo po ashtu FFK aprovon kandidaturën e Agim Ademit për kryetar, refuzon atë të Gramoz Vokrrit

Në vijim postimi i plotë (pa ndërhyrje):

Komisioni fantom i « pavarur » brenda FFK-së vendos të refuzojë nënshkrimet e deponuara. Një gjë të tillë e bën jashtë çdo afati dhe normë statutare.

Kjo tregon qartë tendencën e kundër kandidatit për të eliminuar me çdo kusht konkurencën dhe frymën demokratike të këtij procesi. Në arsyetimin e FFK-së kontestohën nënshkrimet e KIKËS, ULPIANËS dhe PRISHTINËS.

Të bashkangjitura keni faktet që dëshmojnë të kundërtën.

Këto nënshkrime kanë emra, mbiemra dhe vendime nga klubet e tyre.

Me respekt dhe fair play.

/Telegrafi/