0Shares

Deputeti i Partisë Socialdemokrate (PSD), Dukagjin Gorani, ka thënë se partia e tij vazhdon të jetë për zgjedhje të reja, pavarësisht se ato për momentin nuk i konvenojnë këtij subjekti politik.

Gorani, në “Debat Plus” me Ermal Pandurin në RTV Dukagjini, ka thënë se dëshmi që ata janë për rrëzimin e Qeverisë është mbledhja e nënshkrimeve nga deputetët e këtij subjekti politik.

“Aktualisht zhvillohet një teatër që është joproduktiv, por i palejueshëm nuk është. Bojkoti është i lejueshëm, por pjesëmarrja në komisione të obligon të marrësh pjesë edhe në seancat e Kuvendit”, tha Gorani, përcjell Telegrafi.

Deputeti i PSD-së ka thënë se qëndrimet e subjekteve të tjera opozitare karshi PSD-së nuk e ndihmojnë rrëzimin e Qeverisë.

“Sjellja e tillë me PSD-në nga ana e përfaqësuesve të opozitës nuk e ndihmon rrëzimin e qeverisë. Pa PSD-në dihet që Qeveria nuk mund të rrëzohet”.

Gorani ka thënë se nuk ka parë ndonjë shenjë se ka diçka serioze për rrëzimin e Qeverisë.

“Ne, nga momenti i dhënies së nënshkrimeve, nuk kemi parë ndonjë iniciativë serioze për bashkëpunim në rrëzimin e Qeverisë”, tha ai./Telegrafi/

Të Ngjajshme
Shfaq Komentet (0)