Gërxhaliu: Nga gërmimet e deritanishme ende nuk është gjetur asgjë

Mjeku ligjor, Arsim Gërxhaliu ka thënë se ende nuk është gjetur asgjë në kanalin i cili është hapur deri në themelet e xhamisë.

Gërxhaliu në një prononcim për Telegrafin tha se pritet që për pak minuta të hapet edhe një tjetër kanal, afër atij të parit për të parë nëse mund të gjendet diçka.

Edhe kryesuesi i Komisionit Qeveritar për Persona të Zhdukur, Prenk Gjetaj tha për Telegrafin se në kanalin i cili është hapur nën thellësinë e cila është paraparë nuk ka pasur asnjë dëshmi që mund të ketë diçka.

Ai tha se do të hapen edhe kanale tjera deri sa të verifikohet nëse ka apo jo varreze masive.

“Një fotografi është gjetur, është verifikuar por nuk ka asgjë. Duhet të presim deri sa të kryhen gërmimet e parapara”, ka thënë Gjetaj.

Telegrafi merr vesh që në këtë zonë të gërmimeve do të hapen katër kanale.

Po ashtu burime të Telegrafit bëjnë të ditur që gërmadhat e objektit të gjyqit në veri të bombarduara gjatë luftës së fundit i kanë sjell pikërisht në këtë vend pasi në punime shihet një shtyllë e betonit e vendosur horizontalisht, e cila është pjesë e objektit të gjykatës. /Telegrafi/