Organizata Germin ka publikuar të dhëna nga procesi i verifikimit të pakove me fletëvotime të cilat po verifikohen në Qendrën e Numërimit dhe Rezultateve.

Sipas Germin, deri në ora 19:00, janë refuzuar 12 mijë e 566 votues nga diaspora.

Të dhënat e publikuara tregojnë se 26 mijë e 69 zarfe janë hapur, ndërkaq nga to janë verifikuar gjithsej 43 mijë 982 votues.

Ndërkaq, prej tyre janë aprovuar 31 mijë e 416 votues.

“Një pjesë e zarfeve të refuzuara do të rishqyrtohen edhe njëherë nga KQZ, para se të fillojë procesi i numërimit”, thuhet në njoftimin e GERMIN.

Gjatë konferencës për medie nga QNR-ja, zëdhënësi i KQZ-së, Valmir Elezi bëri të ditura arsyet se pse janë refuzuar disa pako me fletëvotime nga diaspora.

“Arsyet e mos aprovimit të tyre janë të ndryshme, dhe janë si në vijim 5 mijë e 78 zarfe janë dërguar nga persona që nuk janë të regjistruar si votues jashtë Kosove, mbi tre mijë zarfe janë dërguar nga persona që nuk janë regjistruar suksesshëm si votues jashtë Kosove gjatë periudhës së aplikimit, sepse nuk kanë plotësuar kriteret ligjore, mbi 900 votues kanë dërguar fletëvotime nga dy herë, mbi 1 mijë e 500 zarfe janë dërguar nga votues të pa identifikuar dhe në 470 zarfe janë dërguar nga votuesit që bashkangjitur kanë pasur dokumente jovalide”, theksoi ai.

Elezi tha se varësisht rekomandimeve të QNR-së, mund të shkojnë në rinumërim edhe vendvotime tjera. Po ashtu, ai tha se në vikend do të fillohet me numërimin e votave me kusht dhe të diasporës, dhe se KQZ javën e ardhshme do të mund të shpall edhe rezultatet përfundimtare. /Telegrafi/