Qeveria e Kosovës merr përsipër mbulimin e Kartonit të Gjelbër për diasporën për vitin 2020

Zëvendësministrja në detyrë e Punëve të Jashtme dhe Diasporës, Liza Gashi, ka njoftuar se Qeveria në detyrë e Kosovës në kuadër të Pakos së Rimëkëmbjes Ekonomike, ka planifikuar që të marrë përsipër mbulimin e kostos së polisave kufitare apo siç njihen si “Karton i gjelbër”, për automjetet që hyjnë në vend për vitin 2020.

Gashi me anë të një njoftimi në Facebook, ka thënë se po punohet edhe në lirimin e biletave për të gjithë ata që vijnë nga diaspora në Prishtinë.

“Jam e lumtur që për herë të parë, në vetëm disa javë përgatitje, si qeveri e Kosovës kemi vepruar në këtë drejtim”, shkroi Gashi, përcjell Telegrafi.

Po ashtu, në kuadër të pakos, Gashi u shpreh se është planifikuar që në 24 muajt në vijim, të emetohen letra me vlerë në masën e 30 milionë eurove tek diaspora.

“Këto letra me vlerë do të kenë një maturitet afatgjatë dhe do të ofrojnë kushte dukshëm më të volitshme për kursimet e diasporës. Përmes kësaj mase, diaspora do të avancohet në bashkëpronare të procesit të rimëkëmbjes ekonomike të vendit”, vijoi ajo. /Telegrafi/