Foshnja lindi në një varkë emigrantësh ndërsa anija me 41 fëmijë dhe 203 të rritur është shpëtuar në ujërat e Italisë

Roja bregdetare italiane ka shpëtuar 41 fëmijë dhe 203 të rritur, duke përfshirë një foshnjë të porsalindur, nga një varkë që po lëvizte disa milje larg brigjeve të rajonit të Kalabrisë.

Sipas mediave të huaja, përcjell Telegrafi, shpëtimi, i kryer gjatë natës të së shtunës dhe të dielës, u ndërlikua nga kushtet e vështira të motit dhe detit dhe zgjati më shumë se 16 orë, tha roja bregdetare në një deklaratë.

Gjithsej 244 persona, nga të cilët 41 të mitur, përfshirë foshnjën e lindur në varkë të shtunën, u shpëtuan.

Italia ka parë një rritje të mprehtë të emigrantëve me varka në javët e fundit dhe ardhjet e fundit do të ushtrojnë presion të mëtejshëm mbi qeverinë e kryeministrit Mario Draghi për të siguruar një marrëveshje me partnerët e Bashkimit Evropian mbi mënyrën e trajtimit të fluksit.

Kjo vjen pasi roja bregdetare italiane shpëtoi rreth 300 emigrantë më 25 nëntor nga një varkë e mbingarkuar që hasi në vështirësi në det të trazuar në Mesdhe, ndërsa ata përpiqeshin të arrinin në Evropë.

Disa nga njerëzit po notonin në ujë ndërsa njësitë e shpëtimit arritën deri te varka rreth 14 milje nga bregu i ishullit jugor italian të Lampedusa.

Operacioni gjatë natës ndërmjet të mërkurës dhe të enjtes përfshiu tri anije dhe një aeroplan, tha roja bregdetare në një deklaratë.

Rreth 62,236 migrantë kanë zbritur në Itali deri më tani në 2021, tregojnë të dhënat e ministrisë së brendshme, kundrejt 32,542 në të njëjtën periudhë të vitit të kaluar. /Telegrafi/