LAJMI I FUNDIT:

Fillon seanca e re e Kuvendit, sërish futet në rend dite Projektligji për rimëkëmbjen ekonomike

Fillon seanca e re e Kuvendit, sërish futet në rend dite Projektligji për rimëkëmbjen ekonomike

Kuvendi i Kosovës ka nisur seancën e re plenare, ku është futur sërish në rend dite votimi i Projektligjit për Rimëkëmbjen Ekonomike.

Kjo u bë me kërkesë të Grupit Parlamentar të LDK-së, të cilët kërkuan që ky Projektligj të futet në rend dite dhe të hidhet sërish në votim.

Shefi i deputetëve të LDK-së, Arben Gashi kërkoi që sot të dalë përsëri në votim ky projektligj.

“Propozoj që pas pikës jashtë rendit të ditës të provojmë edhe një herë të votojmë ligjin për rimëkëmbje ekonomike”, tha Gashi.

E shefi i grupit parlamentar të Vetëvendosjes, Rexhep Selimi tha se qeveria nuk i ka numrat për t’i kaluar ligjet me shumicë të thjeshtë.

“Parimisht nuk kemi pse të jemi kundër votimit, por gjithsesi jemi kundër kësaj mënyre dhe kësaj qasje edhe ndaj Parlamentit të Kosovës, kur Parlamenti i Kosovës po kthehet në një teatër kur skenat e dështuara po përsëriten e po harrojnë që ka detyrë tjetër Kuvendi”, tha Selimi.

Uran Ismajli nga Partia Demokratike e Kosovës tha se kjo nuk u jep zgjidhje halleve të qytetarëve.

“Ne nuk jemi kundër të votohet sa herë të dëshirojnë por kjo nuk u jep zgjidhje halleve të qytetarëve, kjo gjithsesi u bën të provojnë e të tentojnë e asnjëherë mos të japin ndonjë zgjidhje. Mund ta hedhim në votim por nuk besoj që kjo është një përgjigje reale ndaj kërkesave të qytetarëve”, tha ai.

Me 66 vota për, deputetët u pajtuan që të hyjë në rend dite ky Projektligj. Kryetarja e Kuvendit, Vjosa Osmani tha se do ta hedh në votim këtë Projektligj pas deklarimeve jashtë rendit të ditës.

Ndërkaq në seance e cila u mbajt sot në orën 10:00, për të tretën herë më radhë ky Projektligj dështoi të marrë votat e duhura nga deputetët. /Telegrafi/