Karriera pas lindjes: Më pak mundësi për ngritje në pozitë?

Femrat janë dukshëm më pak të prira sesa meshkujt që të rriten në punë pasi të lindin fëmijë, sugjerojnë hulumtimet e reja

Hulumtimet sugjerojnë se rruga drejt avancimit profesional për shumë gra bëhet më e pjerrët pas lindjes së fëmijës.

Një raport i publikuar nga ekspertët britanikë ka zbuluar se vetëm 27.8 për qind e femrave janë të vetë-punësuara apo punojnë me orar të plotë tri vite pas lindjes, krahasuar me 90% të meshkujve.

Të dhënat po ashtu tregojnë se femrat që rikthehen në punë pas pushimit të lehonisë janë 66% më pak të prira të rriten në pozitë gjatë pesë viteve të ardhshme, krahasuar me meshkujt.

Veç kësaj, 17% e femrave e lënë punën gjatë pesë viteve pas lindjes, krahasuar me vetëm 4% të meshkujve.

Hulumtuesit kanë treguar se femrat ende vuajnë ekonomikisht si rezultat i përgjegjësive që i kanë si prind, transmeton Telegrafi.

Këto të dhëna hedhin dritë mbi atë që njihet si “ndëshkimi për amësinë” – një realitet i heshtur për shumë nëna punëtore, që përballen me sfida strukturore dhe pritshmëri sociale që shpesh u mohojnë rritjen profesionale.

Arsyet kryesore pse gratë në realitetin tonë kanë më pak rritje pas shtatzënisë:

1. Perceptimi i ulët i angazhimit profesional

Punëdhënësit shpesh dyshojnë në gatishmërinë e grave për të marrë përgjegjësi të mëdha, pas lindjes së fëmijës.

Ka një paragjykim se nëna “do të mungojë më shpesh” ose “nuk do ketë kohë për projekte sfiduese”.

2. Ndryshimi i prioriteteve për disa gra

▪ Disa nëna zgjedhin me vetëdije të mos kërkojnë avancim për shkak të ngarkesës familjare.
▪ Në vend të pozitave me orar të gjatë apo udhëtime pune, ato mund të kërkojnë fleksibilitet.

3. Mungesa e politikave mbështetëse në vendin e punës

▪ Pushimi i lindjes shpesh nuk përcillet me rikthim të lehtësuar apo trajnime për të rifituar ritmin.
▪ Nuk ofrohen mundësi për punë të pjesshme me perspektivë karriere, apo shërbime kujdesi për fëmijë në vendin e punës.

4. Stigma kulturore dhe presionet sociale

▪ Në shumë kultura, akoma ekziston pritshmëria që gruaja të marrë përsipër barrën kryesore të kujdesit për fëmijët.
▪ Në vend që të mbështeten, gratë shpesh ndihen të gjykuara – si nëse qëndrojnë në shtëpi, ashtu edhe nëse kthehen shpejt në punë.

Ka ardhur koha për politika më të drejta, mbështetje reale për prindërit dhe kultura pune që nuk i ndëshkojnë nënat për rolin e tyre jetik në familje. /Telegrafi/