Facebook mund të dënohet ashpër nga BE, shkak ‘konkurrenca e padrejtë’ me reklama

Facebook po përballet me dy hetime të veçanta antitrusti nga rregullatorët evropianë që do të hetojnë nëse përdorimi i të dhënave nga rrjeti social i jep asaj një avantazh të padrejtë në reklamat në internet.

Hetimet përfundimisht mund të rezultojnë në gjoba të majme dhe të rrisin presionin ndaj Facebook për të bërë ndryshime në modelin e saj të biznesit, i cili tashmë është në qendër të një procesi gjyqësor nga qeveria e SHBA.

Në një deklaratë të premten, Komisioni Evropian tha se po vlerëson nëse Facebook shkel rregullat e konkurrencës së BE duke përdorur të dhënat e mbledhura nga reklamuesit në platformën e saj për të konkurruar kundër tyre.

Komisionerja Evropiane e Konkurrencës Margrethe Vestager, e cila ka filluar hetime të shumta në kompanitë e teknologjisë amerikane, tha në një deklaratë se të dhënat e mbledhura përmes rrjeteve sociale “nuk duhet të përdoren në mënyra që shtrembërojnë konkurrencën”.

“Ne do të shohim në detaje nëse këto të dhëna i japin Facebook një avantazh të panevojshëm konkurrues, veçanërisht në sektorin e reklamave të klasifikuara në internet, ku njerëzit blejnë dhe shesin mallra çdo ditë, dhe ku Facebook gjithashtu konkurron me kompani nga të cilat mbledh të dhëna,” tha ajo në një deklaratë.

Facebook mund, për shembull, të përdorë informacione mbi preferencat e përdoruesve të mbledhura nga veprimtaria e reklamuesve për të përshtatur shërbimin e vet të klasifikuar të reklamave, Facebook Marketplace, thuhet sipas Komisionit, i cili në dhjetor propozoi legjislacionin që do t’u jepte rregullatorëve kompetenca të reja për të kontrolluar gjigantët e teknologjisë amerikane .