Erion Braçe mbron Jakup Krasniqin: Sa shumë dinjitet e ndershmëri prej një burri shqiptar

Zëvendëskryeministri i Shqipërisë, Erion Braçe, ka dalë në mbrojtje të luftës së lavdishme të UÇK-së për çlirimin e Kosovës nga Serbia.

Në reagimin e tij pas paraqitjes fillestare të Jakup Krasniqit para Dhomave të Specializuara të Kosovës, numri dy i Qeverisë shqiptare ka çmuar lart paraqitjen e ish-zëdhënësit të UÇK-së dhe ish-kryetarit të Kuvendit të Kosovës në mbrojtje të vlerave dhe pastërtisë së luftës çlirimtare të UÇK-së përballë agresorit serb.

“Sa shumë dinjitet, krenari, urtësi, vetëpërmbajtje, kthjelltësi, ndershmëri prej njeriu, burri, babai, mësuesi, luftëtari, shtetari, gazetari, shkrimtari, shqiptari, Jakup Krasniqi”, shkruan Braçe në një postim në Twitter.