Presidenti turk, Recep Tayyip Erdogan dërgoi një video mesazh me rastin e ceremonisë së hapjes së Konsullatës së Përgjithshme Turke në Novi Pazar, duke theksuar se popujt e Ballkanit kanë një të ardhme të ndritur përpara.

Duke iu drejtuar auditorit, Erdogan përshëndeti hapjen e Konsullatës së Përgjithshme dhe theksoi se institucioni do të përmirësojë marrëdhëniet midis Turqisë dhe Serbisë, por gjithashtu do të lehtësojë projektet e zhvillimit të Agjencisë Turke për Bashkëpunim dhe Koordinim (TIKA).

Presidenti turk theksoi se konsullata do të kontribuojë në forcimin e lidhjeve emocionale midis Turqisë dhe Sanxhakut dhe se ky bashkëpunim do të tregohet në të gjitha fushat.

“Ne i shohim serbët, boshnjakët, shqiptarët dhe të gjithë popujt e tjerë në Ballkan si miqtë tanë shekullorë me të cilët do të bashkëpunojmë në të ardhmen. Ne besojmë se popujt e Ballkanit, nëse lëvizin së bashku, kanë një të ardhme të mirë”, tha Erdogan.

Ndër të tjera, Erdogan iu referua lëvizjes Fethullah Gulen (FETO), të cilën Turqia e konsideron një organizatë terroriste.

“Turqia do të zhdukë organizatën terroriste FETO nga Ballkani, ku Serbia dhe ne do ta bëjmë atë së bashku me shtetet. Serbia është një nga vendet e para që mbështet përpjekjen e autoriteteve në Turqi pas përpjekjes për grusht shteti dhe i falënderoj për këtë”, tha presidenti turk.

Në hapjen ceremoniale të konsullatës në Novi Pazar, presidentët e Turqisë dhe Serbisë, Recep Tayyip Erdogan dhe Aleksandar Vuçiq, bënë një video -thirrje dhe shiriti u pre nga ministrat e jashtëm të të dy vendeve, Mevlut Çavusoglu dhe Nikola Selakoviq. /Telegrafi/