Ekzekutivi i BE-së ofron 1 miliard euro për të ndihmuar në rindërtimin e pjesëve të goditura në Turqi pas tërmetit

Ekzekutivi i BE-së do të japë 1 miliard euro për të ndihmuar rindërtimin në Turqi, pas tërmeteve shkatërruese më 6 shkurt.

Sipas mediave të huaja, përcjell Telegrafi, kjo është bërë e ditur nga kreu i Komisionit Evropian në nisjen e një konference ndërkombëtare për të mbledhur mbështetjen pas një tërmeti shkatërrues atje muajin e kaluar.

Ursula von der Leyen, tha se tërmeti vrau rreth 50,000 njerëz në Turqi dhe Sirinë fqinje, fatkeqësia më e madhe natyrore në rajon në vite.

“Miliona njerëz janë tani të pastrehë dhe jetojnë në tenda ndërsa dimri vazhdon”, citohet të ketë thënë ajo në fillim të konferencës.

“Ne duhet të mobilizohemi për rindërtim. Shtëpitë, shkollat dhe spitalet duhet të rindërtohen, me standardet më të larta të sigurisë sizmike. Uji dhe kanalizimet dhe infrastruktura e tjera kritike duhet të riparohen, gjithashtu. Shërbimet publike dhe bizneset kanë nevojë për kapital për të rifilluar”.

Ajo bëri të ditur gjithashtu se Komisioni do të shpenzojë 108 milionë euro të tjera për ndihmën humanitare dhe rimëkëmbjen e hershme në Siri, ku Bashkimi Evropian nuk ka lidhje diplomatike me presidentin Bashar al-Assad për një luftë që kishte filluar në vitin 2011.

Programi i Kombeve të Bashkuara për Zhvillim (UNDP) vlerësoi “barrën totale financiare të katastrofës së tërmetit” për Turqinë në rreth 103.6 miliardë dollarë dhe tha se arrinte në 9 për qind të PBB-së së parashikuar të vendit për vitin 2023. /Telegrafi/