Dërgesat e McLaren Artura shtyhen për 4 muaj në mënyrë që të përmirësohet cilësia

Është një fakt i njohur që McLaren Artura ka pasur disa probleme në dalje, por shefi ekzekutiv premtoi t’i rregullonte ato.

I emëruar si drejtor ekzekutiv para një viti, Michael Leiters u tregua shumë i sinqertë në një intervistë dhjetorin e vitit të kaluar, kur tha: “E kemi kuptuar se vetura nuk ishte aq e gatshme, dhe i ndalëm dërgesat e saj”.

“Së fundmi kemi pasur vonesa të shumta në linjën e prodhimit dhe nuk jemi duke prodhuar asnjë veturë, në mënyrë që t’i rregullojmë problemet e cilësisë”, shtoi tutje ai, raporton Motor 1, transmeton Telegrafi.

Gabimet e së kaluarës po e përndjekin ende Artura-n pasi Automotive News pa një memo të dërguar nga McLaren te tregtarët në Shtetet e Bashkuara për t’i informuar ata në lidhje me vonesat e dërgesave për klientët.

Mesatarisht, blerësit duhet të presin edhe katër muaj shtesë, me një shitës me pakicë që përmend se veturat që supozohej të dorëzoheshin në maj, me shtyrjen e dërgesave do të dorëzohen në shtator. Informacioni i brendshëm u konfirmua nga Roger Ormisher, zëdhënësi i kompanisë.

Shkaku i kësaj vonese lidhet me “procedurat e zgjeruara testuese” pasi marka e super-veturave me bazë në Woken dëshiron që të implemtentoi “kontrolle dhe testime shtesë në procedurën e kontrollit të kualitetit”. /Telegrafi/