Deklarata e presidentit Biden për Ballkanin, përplasja e Kurtit me kryeministren e Serbisë dhe seanca për dialogun – top lajmet e javës

Javën që lamë pas janë shënuar një mori ngjarjesh të cilat kanë nxitur reagime në vend.

Reagime ka nxitur edhe lajmi se presidenti amerikan Joe Biden ka lëshuar një urdhër për bllokimin e pronës së personave që kërcënojnë përpjekjet stabilizuese në Ballkanin Perëndimor.

Po javën që po lëmë pas kryeministri i Kosovës, Albin Kurti ka marr pjesë në Samitin me liderët e Ballkanit që u mbajt në Tiranë, ndërsa ka folur edhe për përplasjen që ka pasur me kryeministren e Serbisë, Ana Brnabiq.

Po ashtu, javën që po e lëmë është mbajtur liturgji në kishën e ashtuquajtur të “Krishtit Shpëtimtar”, e cila ndodhet brenda kampusit të Universitetit të Prishtinës në kryeqytet, objekt ky i kontestuar tash e sa kohë.

Të premten është mbajtur edhe seanca e Kuvendit të Kosovës për dialogun me Serbinë, ku pati replika pozitë-opozitë.

Biden: Bllokim prone dhe ndalim i hyrjes në SHBA për personat që kontribuojnë në destabilizimin e Ballkanit Perëndimor

Presidenti i SHBA-së, Joe Biden ka zgjeruar fushëveprimin e aktit për bllokimin e pronës së personave që kërcënojnë përpjekjet stabilizuese në Ballkanin Perëndimor.

Ky urdhër përfshin ish-vendet e ish- Republikës së Jugosllavisë dhe Shqipërinë. Sipas Biden gjatë dy dekadave të fundit ka pasur minim të marrëveshjeve, institucioneve, korrupsion brenda qeverive dhe institucioneve që kërcënon sigurinë kombëtare dhe politikën e jashtme të SHBA.

Ambasadorja amerikane në Tiranë, Yuri Kim, duke postuar urdhrin e Presidentit Biden, ka shkruar në Twitter se lufta ndaj korrupsionit është një interes thelbësor i sigurisë kombëtare të SHBA.

“Duke qenë se situata në territorin e ish Republikës Socialiste Federale të Jugosllavisë dhe Republikës së Shqipërisë (Ballkani Perëndimor), gjatë dy dekadave të fundit, duke përfshirë minimin e marrëveshjeve dhe institucioneve të pasluftës pas prishjes së ish Republikës Federale Socialiste të Jugosllavisë, si dhe korrupsionit të përhapur brenda qeverive dhe institucioneve të ndryshme në Ballkanin Perendimor, pengon progresin drejt qeverisjes efektive dhe demokratike dhe integrimin e plotë në institucionet transatlantike, dhe në këtë mënyrë përbën një kërcënim i pazakontë për sigurinë kombëtare dhe politikën e jashtme të Shteteve të Bashkuara”, thuhet ndër të tjera në urdhrin e firmosur nga Biden, transmeton Telegrafi.

Kurti flet për përplasjen me Brnabiqin në Tiranë: Serbia vazhdon të mos e pranojë që Kosova është e pavarur dhe sovrane

Kryeministri i Kosovës, Albin Kurti pas takimit me liderët e Ballkanit në Tiranë u shpreh se Serbia duhet të shkëputet dhe të distancohet nga regjimi i Millosheviqit duke qenë se nuk ka zgjidhje tjetër veçse të njohë pavarësinë e Kosovës.

Kurti në një konferencë për medie foli edhe për një polemikë me kryeministren serbe Ana Brnabiq.

“Ka ekzistuar një lloj polemike le të themi për shkak se Brnabiç nuk dëshironte të pranonte se Kosova është shtet i pavarur dhe sovran, me ç’rast unë theksova se Serbia do të duhej të shkëputej duke u distancuar nga regjimi i Millosheviqit dhe trashëgimia e tij, sepse nuk ka zgjidhje tjetër përveç njohjes së pavarësisë së Kosovës. Ne duam të integrohemi në BE dhe në NATO. Njohja e Pavarësisë së Kosovës nuk është e mirë vetëm për Kosovën, që besa është jo më pak e vlefshme edhe për vetë Serbinë, e cila në këtë mënyrë po e mban vetën peng. E kam theksuar edhe më herët se para 13 viteve, Kosova ka shpallur pavarësinë nga Serbia, e edhe Serbia duhet të shpall pavarësinë nga Kosova”, theksoi Kurti.

Sipas tij, nismat rajonale të Ballkanit Perëndimor po ngecin pikërisht për shkak të Serbisë, e cila po refuzon ta njoh pavarësinë e Kosovës.

Serbët kryejnë ritet fetare në kishën që ndodhet në oborrin e kampusit të Universitetit të Prishtinës

Gjatë javës që po lëmë pas është mbajtur liturgji në kishën e ashtuquajtur të “Krishtit Shpëtimtar”, e cila ndodhet brenda kampusit të Universitetit të Prishtinës në kryeqytet, objekt ky i kontestuar tash e sa kohë.

“Ipeshkvi Theodosius dhe priftërinjtë dhe besimtarët u mblodhën në tempullin e papërfunduar me rastin e festës së Ngjitjes së Zotit.

Pas shërbimit dhe prerjes së tortës së festës, Peshkopi Teodosije tha se arsyeja e tubimit të sotëm në Prishtinë ishte lutja dhe se ishte gjëja më e mirë që mund t’i ofronim Zotit”, thuhet në njoftim.

Kisha ortodokse serbe është ndërtuar në hapësirat e Universitetit të Prishtinës në vitin 1992, pas marrjes së dhunshme të pushtetit nga Serbia më 1989.

Seanca për dialogun, momentet më interesante: “Mos më rrëzoni edhe njëherë, se mandej…”, “Nuk është tu t’rrëzu askush, mos bëj dramë”!

Seanca e së premtes ku u debatua për ecurinë e deritashme të dialogut me Serbinë, filloi me humor të mirë nga kryeparlamentari, vazhdimi i saj ishte plotë me polemika, akuza e kundërakuza, si nga ana e opozitës, edhe nga ana e pozitës.

Kryeministri i Kosovës, Albin Kurti gjatë fjalës së tij, ka kritikuar procesin e deritanishëm të dialogut me Serbinë, duke thënë se qasja ka qenë e gabuar, transmeton Telegrafi.

Kurti ka pohuar se “Mungesa e afateve kohore e ka dëmtuar procesin e dialogut”.

Kritika erdhën nga krerët e partive opozitare, Enver Hoxhaj, Lumir Abdixhiku e Ramush Haradinaj.

Të tre ata kritikuan Kurtin për ndryshim të qëndrimeve, se po shkon në dialog i papërgatitur dhe se po ik nga kauza që e ka ndërtuar me vite.

Rasti “Thirrjet”: Të përfshirë 24 persona, sekuestrohen rreth 2 milionë euro dhe 9 vetura

Prokuroria Speciale ka njoftuar se ka shënjestuar një rast ku janë të përfshirë 24 persona, ku në këtë rast janë ngrirë 700 mijë euro dhe janë sekuestruar afro 2 milionë të tjera e 9 vetura.

“Kryeprokurori i Prokurorisë Speciale të Republikës së Kosovës, Blerim Isufaj, ka mbajtur sot takimin e radhës me ekipin e përbashkët për përzgjedhjen dhe shënjestrimin e Krimeve të Rënda ku kanë shënjestruar një rast të ri të koduar si “Thirrjet”, thuhet në komunikatë.

Prokuroria Speciale njofton se në rastin e shënjestruar si “Thirrjet”, ku janë të përfshirë 24 persona për veprën penale “Pjesëmarrja ose organizimi i grupit kriminal të organizuar” nga neni 277 lidhur me veprën penale “Mashtrimi” nga neni 323 paragrafi 4 lidhur me paragrafin 1 të KPRK-së.

“Gjithashtu, nga shënjestrimi i këtij rasti janë ngrirë rreth shtatëqind mijë euro, si dhe janë sekuestruar një milion e shtatë qind mijë euro kesh dhe nëntë vetura”, thuhet tutje në komunikatë. /Telegrafi/