DASH jep shpërblim deri në 10 milionë dollarë për dhënien e informacioneve rreth sulmeve kibernetike në Mal të Zi

Departamenti amerikan i Shtetit (DASH) njofton për dhënien e shpërblimit deri në 10 milionë dollarë për dhënien e informacioneve që mund të ndihmojë në zbardhjen e hetimeve mbi sulmet kibernetike të kryera kundër interesave të Shteteve të Bashkuara të Amerikës, veçanërisht në sulmet e ndodhura në Mal të Zi.

Billbordet, të cilat reklamojnë një shpërblim për dhënien e informacionit që mund të çojë në identifikimin ose vendndodhjen e çdo personi që ka marrë pjesë në aktivitete keqdashëse kibernetike, janë vendosur nga Ambasada amerikane në disa lokacione në Podgoricë.

Teksti i shpalljes është në gjuhën malazeze dhe ruse dhe theksohet se pagesa është e mundur edhe në kriptovaluta.

Sipas Ambasadës, qëllimi i reklamës është të mbledhë informacione nga individë që aktualisht jetojnë në Mal të Zi dhe që mund të kanë njohuri më shumë për sulmet.

“Oferta e shpërblimit është e pakufizuar për sa i përket informacionit të kërkuar dhe shpërblimet paguhen në raport me cilësinë e informacionit të dhënë”, thuhet në përshkrimin e njoftimit.

Konkretisht, sulmet ndaj rrjetit informativ të Qeverisë së Malit të Zi filluan në gusht të vitit të kaluar, pas së cilës u pamundësua qasja në ueb-faqet dhe e-mailet e tyre, si dhe në institucionet e tjera si prokuroria, gjykatat, kadastra dhe administrata doganore.

Njoftimi thotë se aktivitetet kibernetike keqdashëse tregojnë nevojën për të mbrojtur ekosistemin dixhital.

Lexo po ashtu Spiunët, oligarkët dhe sulmet kibernetike: Pse Mali i Zi është kaq i rëndësishëm për Rusinë

“Informacionet në lidhje nga sulmet me Ransomware në sistemet shtetërore të informacionit, ndërhyrjet në zgjedhje ose aktivitetet kibernetike keqdashëse kundër infrastrukturës kryesore të SHBA-së mund të raportohen duke ardhur në Ambasadën e SHBA-së në Podgoricë”, vijon thirrja.

Programi i Shpërblimeve i Departamentit të Shtetit është botëror në natyrë për të gjeneruar informacione vepruese që mbron amerikanët.

Ky Program ofron shpërblime për informacion mbi terrorizmin, ndërhyrjen e huaj në zgjedhjet e SHBA-së dhe aktivitetin e huaj keqdashës kibernetik kundër vendit.

Ekspertët e Zyrës Federale të Hetimeve (FBI) ndihmuan në tejkalimin e pasojave të sulmit kibernetik ndaj institucioneve shtetërore të Malit të Zi, të ndodhura vitin e kaluar.

Kujtojmë se Mali i Zi është anëtar i NATO-s që nga viti 2017. /REL/