Cybertruck ndryshon ngjyrën në vetëm pak minuta për “vetëm” 2000 dollarë

Edhe pse Tesla Cybertruck tërheq vëmendjen vetë nga dizajni i tij unik, shumë pronarë dëshirojnë t’i japin një prekje personale karrocerisë prej çeliku inox.

Edhe pse foliet ‘vinili’ kanë qenë zgjedhja kryesore për personalizim deri më tani, kompania Cybertruck Covers ka prezantuar një alternativë më të thjeshtë dhe më fleksibile – foliet magnetike të ripërdorshme, të cilat mund të vendosen ose hiqen brenda pak minutash.

Ndryshe nga foliet tradicionale, të cilat kërkojnë instalim profesional të kushtueshëm dhe janë të vështira për t’u hequr, këto folie magnetike duket se janë shumë më të lehta për t’u përdorur. Ato mund të ndërrohen me ngjyra të ndryshme, të ripërdoren dhe të aplikohen në shtëpi pa mjete të veçanta. Në thelb, ofrojnë një mënyrë të shpejtë dhe efektive për të freskuar pamjen e Cybertruckut. Disavantazhi është se skajet mbeten të ekspozuara, ndryshe nga foliet tradicionale.

Cybertruck Covers do të ofrojë folie magnetike në një gamë të gjerë ngjyrash, duke përfshirë të bardhë, të zezë, blu, jeshile, ari shkretëtire, rozë-ar, bakër, portokalli, të kuqe dhe madje edhe folie që ndryshojnë ngjyrë.

Këto folie janë të dizajnuara për t’u përshtatur me çdo pjesë të karrocerisë së Cybertruck, ndërsa skajet e mprehta të mjetit ndihmojnë për të fshehur zonat e ekspozuara përgjatë nyjeve të paneleve.

Produkti ende nuk ka arritur te konsumatorët, por Cybertruck Covers ka ndarë foto të prototipit në rrjetet sociale. Në një video të shkurtër, shihet se si një folie magnetike e bardhë rrëshqet lehtësisht mbi pjesën e përparme të kamionit, ndërsa instaluesi e rregullon me kujdes rreth shiritit të dritave.

Kompania pohon se prototipi është testuar në kushte të “ftohta, me shi dhe erë të fortë me shpejtësi rreth 134 km/h” dhe se foliet magnetike “qëndruan të paprekura në mënyrë perfekte”.

Sa i përket çmimit, një set i plotë me folie magnetike kushton 2000 dollarë, pavarësisht ngjyrës, ndërsa mbrojtësi i panelit të përparmë është në dispozicion për 195 dollarë. Kjo është dukshëm më e lirë krahasuar me foliet zyrtare të vinilit të Tesla-s për Cybertruck, të cilat në disa qendra shërbimi kushtojnë rreth 4500 dollarë, ndërsa foliet mbrojtëse PPF mund të arrijnë mbi 7500 dollarë. /Telegrafi/