Lajme Kosovë

Çmimet e larta të produkteve në Kosovë, a pritet të ketë rënie të inflacionit këtë vit?

Qytetarët e Kosovës tash e rreth dy vite janë prekur nga rritja e çmimeve, duke filluar nga gjërat ushqimore, veshmbathje e çdo shërbim tjetër.

Inflacion ka pasur në mallra dhe shërbime, e për këtë qytetarët janë shprehur mjaft të shqetësuar.

Për situatën e krijuar ka folur kryetari i Odës Ekonomike të Kosovës (OEK), Lulzim Rafuna.

Rafuna në intervistën e dhënë për Telegrafin, ka thënë se Kosova kishte importuar inflacionin, dhe se lufta mes Ukrainës dhe Rusisë ishte baza ku kishte filluar inflacioni.

“Lufta Ukrainë – Rusi ishte ai baza ku ka filluar të ketë një ngritje të inflacionit për shkak të mungesës së energjisë elektrike. Për shkak të mungesës së gazit, rritjes së çmimit të bursat të energjisë elektrike, me pas rritja e çmimit të derivateve. Dhe këto ishin ato burimet kryesore që ndikuan edhe pasiguria e tregjeve mos të harrojnë”, thotë Rafuna.

Ndërkaq, Rafuna thotë se tani Bashkimi Evropian ka gjetur alternative të furnizimit me gaz.

“Në këtë periudhën kohore mes 2023 dhe 2024 në Bashkimin Evropian kanë gjetur alternativa të furnizimit me gaz me energji elektrike dhe tani nuk diskutohet mungesa as e gazit as energjisë elektrike, po bile nuk diskutohet as ngritja e çmimit të gazit apo të energjisë elektrike dhe sipas trendeve që sillen dhe të gjitha analizat që janë bërë ë tregun e Bashkimit Evropian në 2024 nuk parashihet që të ketë rritje të inflacionit dhe me mosrritjen e inflacionit do të ketë edhe ulje të normave të interesit”, ka potencuar ai.

Duke diskutuar për ketë temë, Rafuna thotë se “dihet që Banka Qendrore Evropiane, po edhe në vendet tjera, në tregun amerikan dhe në tregun aziatik normat e interesit janë rritur për ta frenuar inflacionin”.

“Tani me frenimin e inflacionit, d.m.th nuk ka arsye jo vetëm që normat e interesit të shkojnë lart, ose të rrinë në nivelin që janë, mirëpo duhet edhe të zbresim edhe trendet.

Rafuna beson se në vitin 2024 do të ketë rënie të inflacionit por edhe rënie të normave të interesit.

Kurse, sa i përket parave false që po qarkullojnë në treg, Rafuna thotë se ky problem ende nuk është eliminuar tërësisht.

Rafuna bëri thirrje që bizneset të marrin monedhat dy euro prej burimeve të sigurta,

“Na kemi bërë thirrje të gjitha bizneseve, dhe ju bëjë thirrje prapë të gjitha bizneseve, që dy euro që janë origjinale, ato ku shihet, ku munden me vërtetu. që të mos i refuzojnë, po t’i marrin. Inkurajoj bizneset që 2 euro t’i marrin prej burimeve të sigurta në fakt, d.m.th përmes kompanive ose përmes bankave të furnizohet me dy euro edhe inkurajoj sa më shumë bizneset që të përdorin edhe kartelet për pagesa”, theksoi ai.

Kryetari i Odës Ekonomike ritheksoi se monedhat dy euro janë valutë zyrtare dhe nuk mund të refuzohen.

Në intervistë, Rafuna ka folur edhe për ndikimin që do ta ketë liberalizimi i vizave në ekonominë kosovare si dhe për qarkullimin e parave false në treg./Telegrafi/