Viti 2023 ishte i mirë për disa sporte, por për shumë prej tyre ishte vit i dështuar.
KOK-u mori pjesë në katër gara ndërkombëtare, por përveç pjesëmarrjes, në asnjërën prej garave nuk fitoi medalje.
Garat në të cilat u përfaqësuan sportistët tanë ishin dy Festivalet Olimpike për të Rinj, atë Dimëror dhe Veror, Lojërat Mesdhetare në Rërë dhe Lojërat Evropiane.
Në këtë të fundit iu afrua zonës së medaljes me boksieren Donjeta Sadiku e cila doli e pesta.
KOK-u si institucion u dallua në arritjen historike, më të madhen ndonjëherë për sportin tonë. Kandidatura për organizimin e Lojërave Mesdhetare Prishtina 2030, fitoi në Asamblenë e Përgjithshme të Komitetit Ndërkombëtar të Lojërave Mesdhetare, të mbajtur në Heraklion të Kretës së Greqisë, kur i pranishëm ishte edhe kryeministri Albin Kurti.
FUTBOLLI
Kombëtarja A pati një vit dëshpërues, duke mos realizuar synimin “Kosova në Evropian”, përkundër se shorti i hedhur jepte mundësi të artë që djemtë tanë do të zënë njërën nga dy pozitat e para që dërgonin në EURO 2024.
Në 2023-tën, futbolli më shumë u dallua për vajzat të cilat nga Liga C e Kombeve u kualifikuan në Ligën B. Sukses pothuajse të njëjtë arritën edhe vajzat U-17, kurse Kombëtarja U-19 e djemve u kualifikua në raundin elitë për kualifikimet për Kampionat Evropian.
Ballkani sërish nga klubet kishte suksesin më të madh, duke arritur në fazën e grupeve të Ligës së Konferencës.
BASKETBOLLI
Kombëtarja A e basketbollit ishte afër kalimit të raundit parakualifikues për Eurobasket 2025, por në ndeshjen vendimtare të luajtur në Prizren, pësoi humbje nga Danimarka.
Me rezultate nuk është se u shquan as grupmoshat e reja. Ajo që vlen të përmendet tek basketbolli është emërimi i kryetarit të FBK-së, Arben Fetahu, anëtar i Bordit Ekzekutiv të FIBA Evropës, si dhe organizimi i Kampionateve Evropiane të Divizionit C për grupmosha të reja dhe turneve në basketbollin 3X3.
Gara ndërkombëtare pritet të organizojnë edhe gjatë vitit 2024.
HENDBOLLI
Edhe tek hendbolli nuk pati ndonjë sukses për t’u veçuar tek Kombëtaret A, ku pësuan humbje në të gjitha ndeshjet e të dyja konkurrencave.
Por, suksesin e ruajtën tek Kombëtarja U-17 e vajzave, ku fituan garën e IHF Trophy të organizuar nga FHK-ja në Prishtinë për U-17 dhe U-19. Ky sukses i U-17 iu mundëson që vitin e ardhshëm të garojnë në IHF Trophy Ndërkontinentale, ku synojnë të kualifikohen në Kampionatin Botëror.
VOLEJBOLL
Volejbolli për herë të parë arriti një sukses me një kombëtare gjatë këtij viti. Ishin vajzat U-17, që shkruan historinë, duke kaluar një raund kualifikues për Kampionatin Evropian U-17.
Volejbolli vazhdon të ketë më shumë rezultate me vajzat dhe djemtë në volejbollin në rërë, ku medaljet Ballkanike nuk iu munguan as këtë vit, edhe pse pjesëmarrja e shteteve pjesëmarrëse në gara të tilla të volejbollit mbetet e vogël.
XHUDO
Xhudo vazhdon të mbetet krenaria e sportit tonë, ku sukseset në asnjë vit nuk i mungojnë.
Xhudistët tanë e mbyllën vitin 2023 me katër medalje të fituara në Kampionatin Evropian në Montpellier të Francës, prej tyre një të argjendtë me Laura Fazliun dhe tri të bronzta me Akil Gjakovën, Distria Krasniqin dhe Nora Gjakovën.
Krahas medaljeve tjera të shumta në garat Masters, Grand Slam dhe Grand Prix, xhudo organizoi për herë të parë Kampionatin Evropian të Hapur në Prishtinë, ku para tifozëve të vet, fitoi gjysmën e medaljeve, një të artë dhe tri të bronzta.
Falë sukseseve të këtij viti, pesë xhudistët e prirë nga kryemjeshtri Driton Kuka dhe heroina Majlinda Kelmendi: Distria Krasniqi, Laura Fazliu, Nora Gjakova, Akil Gjakova dhe Loriana Kuka, ndodhen brenda normës olimpike për Lojërat Olimpike Paris 2024.
Befasia më e këndshme e këtij viti ishte Laura Fazliu, e cila me sukseset e saj, po e mbyll vitin në ve din e dytë të renditjes botërore dhe olimpike, në kategorinë -63 kg.
ATLETIKA
Muhamet Ramadani vazhdon të mbetet shpresa e madhe e atletikës për të ardhmen. Gjatë këtij viti ai fitoi medaljen e bronztë në Kampionatin Evropian U-23, ndërsa të artën e fitoi në Kupën Evropiane U-23.
Atletika u dallua edhe me garën tradicionale të maratonës, të organizuar edhe këtë vit në Prishtinë, në edicionin e 22-të të saj.
KARATE
Karate gjatë tërë vitit pati probleme me ndasi në udhëheqje dhe duke mbajtur Kuvende të shumta Zgjedhore, por përkundër kësaj, në fund të muajit tetor arritën rezultat historik.
Për këtë u përkujdesën vajzat tona, Fortesa Orana, Hatixhe Zejnullahu, Vlera Qerimi dhe Albulena Gërvalla, të cilat në disiplinën ekipore fituan medaljen e bronztë në Kampionatin Botëror në Budapest.
BOKS
Për dallim nga viti 2022, ku fituan medalje botërore dhe evropiane me Donjeta Sadikun dhe medalje mesdhetare me Shpëtim Bajokun, këtë herë një sukses i tillë i mungoi boksit për senior.
Sidoqoftë, Bashkim Bajoku, fitoi medaljen e bronztë për U-22 dhe Ensar Badallaj të argjendtën për shkollarë. Medalje boksi fitoi edhe në kampionatin Ballkanik.
TAEKWONDO
Taekwondo u dallua me sportistin të cilin e bindi që të lë Suedinë dhe të garojë për Kosovën. Është ky Bleron Ademi, i cili që në debutimin e tij me fanellën e vendlindjes së tij, fitoi medaljen e argjendtë në Kampionatin Evropian U-22, të mbajtur në Bukuresht të Rumanisë.
Taekwondo nuk është se u shqua për ndonjë sukses tjetër, hiq Kampionatin Ballkanik, ku fituan medalje ne grupmosha të ndryshme.
KICKBOX
Edhe kickboxi u dallua me grupmosha të reja, ku fitoi medalje në Kampionatin Evropian për të rinj. Këtë e bëri Rron Kasumi, I cili u stolis me medaljen e argjendtë, duke shënuar dy fitore në kategorinë e tij.
BODYBUILDINGU
Garuesit e bodybuildingut dhe fitnessit, vazhdojnë të shkëlqejnë në gara ndërkombëtare. Këtë herë fituan tri medalje në Kampionatin Evropian në Santa Sussana të Spanjës me garuesit, Betim Krasniqi, Kushtrim Bajraktaraj dhe Flamur Rexhaj.
SKITARIA
Federata Skitare e Kosovës natyralizoi garuesen e kërcimeve me ski, Sophie Sorschag, e cila la Austrinë për vendin tonë. Sorschag është skitare e dalluar, pjesëmarrëse në Lojërat Olimpike Dimërore në Pekin 2022 dhe medaliste botërore në ekipore me Austrinë.
Garuesit tjerë, të skijimit alpin, mbesin larg suksese në gara të rëndësishme ndërkombëtare.
TENIS
Kombëtarja e tenisit, në konkurrencën e meshkujve arriti sukses historik. Djemtë tanë shënuan katër fitore në po aq përballje, duke u kualifikuar në grupin e 3-të të David Cup, që ndryshe njihet si Kampionat Botëror.
SPORTET TJERA
Sportet tjera nuk është se patën ndonjë dallim të madh për t’u veçuar, përfshirë këtu edhe mbretëreshën e sporteve, notin, ku pavarësisht përfaqësimit në Botëror e Evropian, rezultatet e arritura nuk japin shpresë për një ardhme të ndritur edhe në vitet në vijim.
/Telegrafi/
Promo
Reklamo këtuLufta Prigozhin - Putin
Më shumëKarim Benzema kthehet në Real Madrid
Ancelotti po mendon vendimin e befasishëm, ta lë në stol ndaj Bayernit njërin nga më meritorët e sukseseve këtë sezon
Shtatë lojtarët që mund të largohen nga Man City këtë verë
Tifozët kanë mbetur të shokuar me pritjen që iu bë Toni Kroosit në ‘Allianz Arena’
Barcelona kërkon pesë përforcime këtë verë në katër pozicione të ndryshme
UEFA zgjedh formacionin më të mirë të javës në Ligën e Kampionëve, dominojnë lojtarët e Dortmundit
Investoni në të ardhmen tuaj – bli banesë në ‘Arbëri’ tani! ID-140
Shitet banesa në Fushë Kosovë në një vendodhje perfekte – 80.5m², çmimi 62,000Euro! ID-254
Ideale për zyre – në qendër të Prishtinës lëshohet banesa me qira ID-253
Bli shtëpinë e ëndrrave tuaja në Prishtinë – ZBRITJE në çmim, kapni mundësinë tani! ID-123
Krijo hapësirën tënde të biznesit – zyre me qira te 4 Llulat – 300€/muaj ID-252
Më të lexuarat
UEFA zbulon lojtarin më të shpejtë për këtë edicion në Ligën e Kampionëve
Zyrtare: Bundesliga me pesë skuadra në Champions duke iu falënderuar Dortmundit
A di të ndalet ky Ronaldo? Çfarë goli me këmbën e majtë
Mohamed Salah thyen heshtjen në rrjetet sociale pas përplasjes që kishte me Jurgen Klopp
Të gjithë po pyesin për ritualin e Bellingham para çdo ndeshjeje – anglezi shpjegon përse e bën
Bajrami: Jam i gatshëm ta ndihmoj Kurtin në procesin e Asociacionit