Çështja e bartjes së shamisë në një shkollë në Gjakovë, Koci: Drejtoresha Florentina Gjergjaj po kërcënohet me jetë

Një vendim i Shkollës së Mesme Teknike “Nexhmedin Nixha” në Gjakovë, për të vendosur simbole ndaluese për vendosjen e shamisë në shkollë, ka nxitur reagime duke rikthyer sërish në qendër të vëmendjes debatin për lejimin apo jo të mbajtjes së shamisë nga nxënësit.

Lidhur me këtë vendim, tash e disa ditë pre e kërcënimeve të shumta ka qenë drejtoresha e kësaj shkolle, Florentina Gjergjaj.

Kështu ka bërë të ditur avokati Arianit Koci përmes një postimi në Facebook, ku ka treguar se pre e kërcënimeve me jetë janë edhe pjesëtarët e familjes së Gjergjajt.

Koci tutje ka theksuar se shkaku i këtyre kërcënimeve familja Gjergjaj nuk ka dalë nga shtëpia dhe se të njëjtit po mendojnë ta lëshojnë Kosovën.

Lidhur me këtë çështje ishte deklaruar edhe kryetari i AAK-së, Ramush Haradinaj i cili tha se vendosja e simboleve të tilla në shkolla është e panevojshme.

Edhe drejtoresha e Arsimit në komunën e Gjakovës, Eranda Kumnova-Baçi tha se vendimi për të vendosur ato simbole ka qenë individual nga ana e drejtoreshës së shkollës.

Lexo po ashtu Drejtoresha e Arsimit në Gjakovë: Simbolet të papranueshme, por Udhëzimi Administrativ ndalon mbajtjen e shamive në arsimin parauniversitar

Postimi i plotë i Kocit:

Kërcënimet me jetë ndaj drejtoreshës Florentina Gjergjaj dhe fëmijëve të saj, janë të papranueshme.
Ka disa ditë që:
– Drejtoresha kërcënohet me jetë;
– Fotoja e fëmijëve qarkullon në rrjete sociale, me kërcënime direkte në stilin: “Ta dijmë shtëpinë”;
– Në rrjete sociale kërkohet haptazi që t’i hidhet acid në fytyrë;
Për shkak të kërcënimeve serioze, të orkestruara dhe të vazhdueshme:
– Familja Gjergjaj ka dalë prej shtëpisë;
– Fëmijët nuk po shkojnë në shkollë;
– Po mendojnë seriozisht ta lëshojnë Kosovën.
Prandaj, nëse dikush mendon që drejtoresha ka bërë shkelje, le të inicion procedurë para organeve kompetente.
Kërcënimet brutale ndaj një familjeje, janë të pa tolerueshme.
Njëjtë është e pa tolerueshme që deri tani, nuk kanë reaguar ndaj këtyre kërcënimeve as presidentja, as kryeministri, as kryetari i komunës e as kryetarët e partive politike. /Telegrafi/