Celine Dion testohet për coronavirus, detyrohet të shtyjë për në nëntor dy koncertet e parapara të mbaheshin këtë muaj

Këngëtarja me famë botërore, Celine Dion, është detyruar të shtyjë datat e ardhshme të turneut në Washington, DC dhe Pittsburgh.

Pasi u raportua për një ftohje, 51-vjeçarja shfaqi simptoma dhe mjekët nën dyshim, e testuan atë për coronavirus.

Por për fat të mirë, testet e artistes rezultuan negative, shkruan Page Six.

“Të hënën natën, një ditë pasi mbaroi një xhiro me gjashtë shfaqje në zonën e New York, Celine filloi të ndjejë simptomat e një ftohjeje të zakonshme”, shkruhet në një njoftim në faqen e saj zyrtare në Facebook.

“Simptomat vazhduan deri të martën dhe mjekët e saj e udhëzuan atë të pushonte për 5-7 ditët e ardhshme. Pasi e testuan, mjekët arritën në përfundimin se virusi i saj nuk kishte lidhje me COVID-19”, thuhej në deklaratë.

“Më vjen keq për zhgënjimin e fansave të mi në Washington DC dhe Pittsburgh”, shtoi Dion në një deklaratë. “Shpresoj se të gjithë e kuptojnë”, u shpreh më tej ajo.

Celine Dion e shtyu koncertin e saj të paraparë të mbahej më 11 mars në “Capital One Arena” për 16 nëntor të vitit 2020, dhe performancën e saj të 13 marsit në “PPG Paints Arena” për 18 nëntor 2020. /Telegrafi/