Çaushi në mbështetje të Kusari-Lilës, thotë se qeverisja e AAK-së nuk bënë të kthehet në Gjakovë

Driton Çaushi i Vetëvendosjes i cili ishte kandidat i kësaj partie për kryetar të Gjakovës, ka dalë haptazi në mbështetje të Mimoza Kusari-Lilës e cila garon në balotazh me Ardian Gjinin e AAK-së.

Çaushi përmes një postimi në Facebook, ka thënë se qeverisja e AAK-së nuk bënë të kthehet në komunën e Gjakovës.

“Në kuadër të kësaj fryme, ne sot e zyrtarizuam koalicionin tonë me Alternativën, LDK-në dhe AKR-në, duke e mbështetur kështu kandidaturën e znj. Kusari-Lila”, ka shkruar Çaushi.

Postimi i plotë:

Të dashur bashkëqytetarë të Komunës së Gjakovës,
Në zgjedhjet e 22 tetorit, mbi 60% e qytetarëve të Gjakovës votuan kundër kthimit të AAK-së në qeverisjen lokale të qytetit tonë.
Ne vazhdojmë të besojmë se Lëvizja VETËVENDOSJE! në këto zgjedhje i ofroi Gjakovës alternativën më të mirë qeverisëse, por fatkeqësisht alternativa jonë nuk mori mbështetjen e mjaftueshme për t’u zbatuar dhe kësisoj ne u renditëm në vendin e tretë.
Sot gjendemi para një situate të re, para dy zgjedhjeve: Ardian Gjinit të AAK-së dhe Mimoza Kusarit nga Alternativa. Padyshim, që ne ashtu sikurse gjatë tërë fushatës, edhe sot mendojmë që qeverisja e AAK-së nuk bën të kthehet në komunën tonë.
Në kuadër të kësaj fryme, ne sot e zyrtarizuam koalicionin tonë me Alternativën, LDK-në dhe AKR-në, duke e mbështetur kështu kandidaturën e znj. Kusari-Lila.
Ne besojmë që ky koalicion do të ofrojë qeverisje të mirë, efikase dhe pa korrupsion për qytetarët e Gjakovës. Garancë për këtë do të jetë edhe Lëvizja VETËVENDOSJE! dhe përfshirja e programit të saj qeverisës në këtë koalicion.
Prandaj, ne ftojmë votuesit tonë dhe të partive tjera nga fshatrat dhe qyteti, që të dielën të votojnë në mënyrë masive në mënyrë që ta parandalojmë rikthimin e krimit në Komunën tonë dhe t’i mundësojmë qytetit tonë zhvillimin në katër vitet e ardhshme.