BONEVET fillon projektin “Edukimi pa Barriera”

Duke filluar nga janari 2020, Fondacioni BONEVET Gjakovë dhe Fondacioni BONEVET Kaçanik kanë filluar implementimin e projektit “Edukimi pa Barriera” i cili do t’u mundësojë më shumë se 200 fëmijëve nga grupet e margjinalizuara dhe komunitetet të bëhen pjesë e aktiviteteve edukuese në BONEVET.

BONEVET ofron një mjedis miqësor për të krijuar dhe stimuluar kureshtjen, imagjinatën dhe krijimtarinë e fëmijëve, duke i inkurajuar që të mësojnë përmes lojës, të zhvillojnë aftësitë komunikuese dhe sociale, të fitojnë eksperiencë në punën ekipore dhe në aftësitë menaxhuese me anë të përdorimit teknologjive të avancuara si mjete edukative.

Qëllimi kryesor i këtij projekti është të mbështesë fëmijët dhe të rinjtë nga grupet e margjinalizuara dhe komunitetet pakicë dhe ti përfshijë ata në edukim praktik, duke i fuqizuar të marrin pjesë në mënyrë të barabartë në të ardhmen sociale, ekonomike dhe politike të vendit.

Kjo planifikohet të arrihet me anë të pjesëmarrjes të më shumë se 200 fëmijëve nga komunat e Gjakovës dhe Kaçanikut në klasat dhe aktivitetet në STEAM (Shkencë, Teknologji, Inxhinieri, Art dhe Matematikë), përgjatë një periudhe 12 mujore, mundësuar edhe nga bashkëpunimet e ngushta me Drejtoritë e Arsimit në komunën e Gjakovës dhe komunën e Kaçanikut.

Të gjitha këto aktivitete mësimore do të ofrohen pa pagesë për pjesëmarrësit, të cilëve u mbulohet edhe transporti nga shkolla deri në BONEVET dhe anasjelltas.

Granti për këtë projekt është mundësuar nga ‘Programi i shoqërisë civile për Shqipërinë dhe Kosovën’, financuar nga Ministria e Punëve të Jashtme të Norvegjisë dhe menaxhuar nga Fondacioni Kosovar për Shoqëri Civile (KCSF) në partneritet me Partnerët Shqipëri për Ndryshim dhe Zhvillim (PA).