Blushi: Partitë politike e duan presidentin për të bërë pazar

Duke sqaruar nga foltorja e Kuvendit qëllimin e amendamentit të firmosur prej 10 deputetëve për zgjedhjen e presidentit nga populli, deputeti socialist Ben Blushi, ka akuzuar kundërshtarët e nismës, duke deklaruar prerë se tre partitë e vjetra PS, PD dhe LSI nuk janë dakord, pasi e duan zgjedhjen e presidentit për të bërë pazar.

Blushi falënderoi firmëtarët, që sipas tij ndonëse me ide, pikëpamje dhe eksperienca të ndryshme i bëri bashkë një bindje e rëndësishme, zgjedhjen e presidentit nga vetë populli.

“Kjo ide është një amendament kushtetues dhe u firmos nga 10 deputetë që i falënderoj përzemërsisht që pranuan ta sponsorizojnë këtë ide, Dade, Shehi, Selami, Duka, Dule, Arapi, Ndoka, Muhedini dhe Hafizi. Jemi 10 deputetë që kemi firmosur amendamentin për zgjedhjen e presidentit nga populli, jemi të partive të ndryshme, pikëpamjeve, eksperiencave të ndryshme, por na bashkon qëllimi për t’i dhënë mundësi shqiptarëve të zgjedhin me votë direkte, pasi mendojmë se presidenti duhet të zgjidhet nga populli i Shqipërisë”, tha Blushi. /Telegrafi/