Betisi ia shkakton humbjen e parë Milanit në Europa League

Ka ardhur humbja e parë e Milanit në fazën grupore të Ligës së Evropës. Rossonerët kanë pësuar me rezultat 2-1 nga Real Betisi në ndeshjen e xhiros së tretë në Grupin F të zhvilluar në San Siro.

Pas gjysmë ore lojë, Antonio Sanabria e ndëshkoi skuadrën vendase duke e zhbllokuar rezultatin, ndërsa Giovani Lo Celso ishte arkitekt i golit.

Mysafirët i patën edhe disa raste të tjera në gjysmën e parë, përmes Sanabrias e Lo Celsos, ndërsa Gonzalo Higuain rrezikoi për vendasit.

Giovani Lo Celso vazhdoi të ishte ndër më të mirët në fushë edhe në pjesën e dytë, në të cilën e dyfishoi epërsinë e mysafirëve me një gol të bukur (54’).

Patrick Cutrone e bëri më interesant fundit e takimit kur shënoi (83’) pas asistimit nga Samu Castillejo, mirëpo Rossonerët nuk ia dolën ta barazonin rezultatin.

Kjo është humbja e parë e Milanit në fazën grupore të Ligës së Evropës këtë sezon, pas dy fitoreve radhazi dhe në këtë mënyrë humb vendin e parë në grup.

Real Betisi e ka regjistruar edhe fitoren e dytë pas tri ndeshjesh, ku ka arritur edhe një barazim. Me shtatë pikë të arkëtuara, skuadra spanjollë mban kreun e Grupit F.

Ndeshja tjetër e këtij grupi është zhvilluar ndërmjet F91 Dudelange dhe Olympiacos, të cilën e ka fituar ekip grek me rezultat 2-0. /Telegrafi/

https://www.dailymotion.com/video/x6w5b8y

https://www.dailymotion.com/video/x6w5daw