Rezultati i zgjedhjeve të djeshme në Drenas “befasoi” disa nga subjektet politike. Dalja e 45% të qytetarëve në votim nuk u solli asnjërit prej kandidatëve për kryetar të Drenasit numrin e mjaftueshëm të votave.

Kështu që Drenasi do të shkojë në balotazh zgjedhor. Nga numërimi i të gjitha votave të cilat u dhanë dje nga qytetarët kanë mundësuar që kandidati nga radhët e Partisë Demokratike të Kosovës, Ramiz Lladrovci dhe kandidati nga Nisma për Kosovën Isa Xhemajlal të shkojnë në balotazh.

E nga ky rezultat më së shumti pësoi Partia Demokratike e Kosovës, gjë të cilën e thonë edhe njohësit e proceseve zgjedhore dhe analistët.
Blerim Burjani, njohës i proceseve zgjedhore në një prononcim për Telegrafin ka thënë se zgjedhjet në Drenas janë tregues se po ndodh vetëdijesimi i qytetarëve, të cilët janë lodhur dhe janë të pa shpresë për të parë ndryshimet në këtë komunë.

“PDK është në krizë të përgjithshme në Kosovë si rezultat i mos reformimit të brendshëm që cilësohet si parti e shefave. Befasia më e madhe konsideroj se është dalja e vogël e qytetarëve në zgjedhjeve vetëm 45% që mund të jetë tregues se në Kosovë mund të reduktohet dukshëm në zgjedhjet eventuale të parakohshme si rezultat i mungesës së një alternative të sinqertë me qytetarë, që nuk janë vetëm përfitues dhe keqpërdorues të pushtetit”, ka thënë Burjani.

Ai ka theksuar se balotazhi është tregues se PDK është në krizë në Drenas për shkak të shumë fraksioneve të saj atje, ku shumica e kandidatëve rival të PDK-së atje dikur ishin pjesë e PDK-së.

“Këto gjëra janë përçarëse që kanë ndikuar edhe në dalje të qytetarëve në zgjedhje dhe shkuarje në balotazh. PDK mund të humbë Drenasin në balotazh si rezultat i inateve të mëdha që ka mbjellë vetë PDK-ja atje”, theksoi Burjani.

E analisti, Imer Mushkolaj theksoi se balotazhi është një debakël për PDK-në.

“Balotazhi është humbje për PDK-në, është debakël. Qytetarët e Drenasit kësaj here kanë votuar jo si t’ia kenë borxh votën PDK-së, por me idenë që të ndryshojë diçka për të mirë”, u shpreh Mushkolaj për Telegrafin.

Ai shtoi se fillimi i fundit të monopoleve dhe bastioneve në politikën kosovare është lajm i mirë. Në 95 vendvotime të numëruara, Ramiz Lladrovci ka marrë 45,21 % të votave, ndërsa Isa Xhemajlaj 27,31 %. Balotazhi pritet të mbahet më datën 1 janar./Telegrafi/