Ashensori i vogël ia vështirëson jetën 70 vjeçarit me karrocë, tash e një vit mbeti brenda në Shtëpinë e të Moshuarve në Prishtinë

Perdet i mban gjithmonë të larguara nga dritaret, 70 vjeçari Garip Sylejmani vetëm kështu mund ta shohë oborrin e Shtëpisë së të Moshuarve në Prishtinë. Sylejmani e do aq shumë natyrën, por për shkak të problemeve me ashensor, ai ka mbetur i mbyllur në dhomë  tash e një vit e gjysmë.

Në dhomën e tij që gjendet në katin e dytë ka edhe disa lule, të cilat sjellin sado pak gjelbërim në vendin ku ai jeton tash e shumë vite.

Në një rrëfim për Telegrafin, Sylejmani tha se ka aq shumë dëshirë të dalë jashtë, por që karrocën e tij nuk e zë ashensori i ri që tashmë e kanë vendosur në Shtëpinë e të Moshuarve në Prishtinë.

Problemi kryesor është hapësira e vogël në ashensor, kur ai nuk mund të lëviz me karrocë.  Kështu nisi rrëfimin Garip Sylejmani nga Dragashi.

“Për pandemi mirë, kam pasur probleme po kam marrë terapi. Po problemi këtu është se krejt çka jemi me karrocë nuk mundemi me dalë në oborr, se që gati 15 muaj nuk kam dalë jashtë.
E kanë rinovuar ndërtesën, u kanë në plan një ashensor të ri me ndërtu, po çka kanë bërë dallavere nuk e di”, tha ai.

Gjatë rrëfimit, Sylejmani tregoi se ashensori i vjetër ka punuar mirë, dhe se në atë kohë ka mundur të dalë jashtë.

“Ashensori i vjetër ka punuar shumë mirë, tani në të riun që e kanë sjellur janë disa kabina dhe askush nuk mundet me hy në karrocë. Jam ankuar për këtë. Tash kam mbetur si burg shtëpiak, është shumë e vështirë të rri kështu. Sa nxehtë u kanë, sikur në burg. Në fillim kur e kanë sjellur kam thënë që është e vogël, më kanë thënë ti nuk dinë. Askush nuk mundet me dalë. Çdo kund shikojnë me ua lehtësu invalidëve, këtu me ia vështirësu”, rrëfeu ai.

Përveç ashensorit, Sylejmani nuk kërkon asgjë tjetër.

“Kërkoj një ashensor tjetër, kjo është kërkesa ime… Për tjera nuk dua me folë”, tha ai.

Telegrafi është interesuar se kur do të bëhet zgjidhja për Sylejmanin, duke adresuar këtë kërkese për qasje në ashensor dhe lehtësim të zhvillimit të jetës normale.

Udhëheqësi i Departamentit të Politikave Sociale dhe familjare në Ministrin e Mirëqenies, Mentor Morina në një përgjigje për Telegrafin ka shpjeguar se së shpejti pritet të bëhet zgjidhja për Sylejmanin dhe personat e tjerë që kanë nevoja të tilla.

Morina tha se ashensori i ri do të  ndërtohet për një muaj.

“Si ministri e Punës kemi në administrim Shtëpinë e të Moshuarve në Prishtinë. Në vitin e kaluar kemi investuar në një ashensor, por ky ashensor nuk po arrin me i plotësu kërkesat e gjithë klientëve, tani jemi në proces të ndërtimit të ashensor të ri. Dhe për një muaj e gjysmë do të jetë aktiv dhe do të eliminohen pengesat për klientët që e kanë të pamundur të qasen në ashensor”, deklaroi ai.

Morina tha se tashmë është përzgjedh kompania, dhe se në mesin e nëntorit do të jetë ashensori i ri.

Ndryshe, në Shtëpinë e të Moshuarve në Prishtinë aktualisht janë rreth 60 persona nga 100 sa ka kapacitet. /Telegrafi/