Arben Gecaj: Vetëvendosje është e krijuar të prodhojë vetëm konflikt

Të pakënaqurit e Lëvizjes Vetëvendosje, tashmë pjesë të Fraksion+, Arben Gecaj dhe Fatos Aliu kanë folur rreth largimit të tyre nga Vetëvendosje dhe planet e tyre në politikë.

Gecaj theksoi se janë brezi i tretë që ka pasur probleme të brendshme në Vetëvendosje, mirëpo brezi i parë që ka guxuar të flasë.

Ai më tej ka thënë se Boiken Abazi ka qenë ai i cili ka fyer rëndë ish koordinatoren e VV-së në Skenderaj, Ajnishahe Halimit duke thënë se Lëvizja Vetëvendosje i kishte paguar shërimin asaj, transmeton Telegrafi.

Gecaj foli edhe rreth përçarjes së bllokut opozitar, duke thënë se ka qenë i bindur që trinomi i krijuar në mes VV-së, AAK-së dhe Nisma-s nuk do të funksionojë.

“Kam qenë i bindur që ky trinom nuk do të funksionoj për shkak se Vetëvendosje është organizatë e cila është e krijuar vetëm të prodhojë konflikt”, ka thënë Gecaj në emisionin “Rubikon”, duke shtuar se VV-ja nuk është “engjëll”.

Ndërkaq Fatos Aliu ka përmendur të gjitha mundësitë që ish- subjekti i tij politik të ketë pasur ndikim apo mundësi ta rrëzojë qeverinë “Në kohën e VLAN-it, Vetëvendosja kishte shumë mundësi, pasi kishte shumicën parlamentare, mirëpo nuk ka pasur gatishmërinë”, ka thënë ai./Telegrafi/