Analistët nuk e shohin veprim të mençur rrëzimin e Qeverisë shkaku i Listës Serbe

Kryeministri Ramush Haradinaj duket se nuk po shqetësohet shumë nga paralajmërimi i Listës Serbe se do ta rrëzojë Qeverinë, shkaku i aplikimit të taksës për mallrat që hyjnë nga Serbia dhe Bosnja. Madje,  kryeministri përsëriti se taksa mund të rritet. Ndërsa, nga shoqëria civile thonë se rrëzimi i Qeverisë për shkak të kësaj çështjeje nuk do të ishte veprimi i duhur politik.

Pas kërcënimit për rrëzimin e Qeverisë nga Lista Serbe, kryeministri i vendit, Ramush Haradinaj, ka thënë se nuk e determinojnë politikën që ndjek ky subjekt.  Për taksën, që u bë shkak që Lista serbe të mbaj këtë pozicion, kryeministri edhe një herë tha se mund të rritet.

“Sa i përket qëndrimit të partnerit tonë në qeveri, është qëndrim i tyre dhe vullnet i lirë politik dhe ne nuk e diktojmë atë… Taksa ndaj produkteve serbe edhe mund të rritet”, deklaroi Haradinaj.

Kurse për njohësit e çështjeve politike në vend gatishmëria e Listës Serbe për t’i dhënë nënshkrimet për rrëzimin e qeverisë, po shihet si i pavend.

Rasim Alija nga D4D, shprehet se sa herë që janë në pyetje interesat e Beogradit ky subjekt i ofron nënshkrimet për rrëzimin e qeverisë.

“Lista Serbe është e gatshme kurdoherë për nënshkrime të tilla, në momentin kur asaj i konvenon të mbrojë qëndrimet e Beogradit”, deklaroi Rasim Alija.

Mirëpo, ai thotë se është në gatishmërinë e subjekteve të tjera parlamentare nëse janë në pajtueshmëri për rrëzimin e qeverisë. Ai në këtë, përmend edhe rolin e ndërkombëtarëve.

“Mundësi për zgjedhje të reja gjithmonë ka, mirëpo është krejt varet nga qëndrimet e subjekteve politike. Është i rëndësishëm edhe qëndrimi i ndërkombëtarëve sa i përket zgjedhjeve të reja”, deklaroi Alija nga organizata “D4D”.

Jetmir Bakija nga “Demokracia Plus” thotë se rrëzimi i qeverisë për shkak të kësaj tarife nuk është vendim i mirë.

“Mendoj që rrëzimi i Qeverisë për shkak të vendosjes së një tarife ndaj Serbisë dhe Bosnjës nuk është vendim i mirë, sepse këto dy vende nuk e kanë ndihmuar asnjëherë shtetin e Kosovës por vetëm e kanë penguar”, thotë Jetmir Bakija nga “Demokracia Plus”.

Ndryshe, opozita është shprehur e ndarë, rreth mundësisë që bashkë me Listën Serbe, ta rrëzojnë qeverinë.

Sipas LDK-së nëse qeveria është formuar me këtë listë, pse të mos rrëzohet. Ndërsa, Vetëvendosje nuk e do ndihmën e tyre./RTV Dukagjini/Telegrafi/