Yjet më të mëdhenj në Hollywood sollën shkëlqimin dhe magjepsjen në tapetin e kuq të edicionit të 27-të të ndarjes së çmimeve, “Critics Choice Awards 2022” të dielën.
Pjesë e yjeve të veshur më së bukuri në këtë mbrëmje ishte edhe shqiptarja Rita Ora.
Rita për eventin kishte zgjedhur një fustan kadifeje të errët të punuar nga “Elie Saab Couture” me detaje të prera përgjatë mesit dhe stomakut duke zbuluar pamjen e saj pa të brendshme.
Por, “pjesëmarrja” e shqiptarëve në këtë mbrëmje vazhdoi edhe me fustanin e përzgjedhur nga aktorja amerikane Angelica Ross.
E stiluar nga Apuje Kalu, ajo u vesh me një fustan të punuar me kujdes prej kreatorit nga Kosova, Valdrin Sahiti.
Në hap me trendet botërore, fustani kishte një prerje në formën e trekëndëshit në mes të gjoksit, duke i shtuar më tej elegancën me një prerje të thellë në këmbën e majtë.
Fustani kishte një nuancë rozë në të artë, i cili dukej edhe më madhështor shkaku i gurëve të vegjël që e mbulonin tërë copën.
Flokët e saj ishin kapur në një topuz gjigant në majë të kokës, ndërkohë që si aksesorë Ross kishte vendosur vath dhe disa unaza në gishta.
Kombinimin aktorja e përfundoi me taka të thjeshta ngjyrë ari.
Ndërkohë, kujtojmë se Valdrin Sahiti ishte pjesë e ngjarjes “CMA Awards 2021” me tre kreacione, teksa stiloi veshje edhe për shumë yje të tjera botërore gjatë vitit që lamë pas. /Telegrafi/
