Akuzat e Kurtit ndaj mediave, AGK: Dënojmë fuqishëm gjuhën ofenduese dhe shumë të rrezikshme të kryeministrit

Asociacioni i Gazetarëve të Kosovës (AGK) ka deklaruar se kryeministri i Kosovës, Albin Kurti, e ka shfrytëzuar mbledhjen e partisë së tij, Vetëvendosje, “që të shënojë një tjetër sulm të papranueshëm kundër medieve”.

Në fjalimin e tij, mes tjerash, Kurti ka thënë se “mediat që për çdo sulm e agresion të Serbisë ndaj shtetit tonë, fajtorin çdoherë e gjetën tek qeveria jonë, por asnjëherë tek Serbia, nuk meritojnë vëmendjen tuaj”.

“Kurrë nuk kanë qenë më shumë media kaq shumë kundër qeverisë sesa në këtë katër vjeçarin tonë. Unë besoj se kjo është për dy arsye apo ndoshta shkaqe themelore. E para, sepse ne nuk i paguajmë. E dyta, sepse tash mediat nuk frikësohen më nga pushteti”, ka thënë Kurti.

AGK-ja thotë se e dënon fuqishëm “këtë gjuhë ofenduese dhe shumë të rrezikshme të kryeministrit Kurti”, që i rendit mediat e Kosovës përkrah Serbisë.

“Një fjalor i tillë i papranueshëm që vjen nga kreu i qeverisë, direkt vë në rrezik sigurinë e gazetarëve dhe punonjësve të tjerë të medias”, ka shtuar AGK.

“Është koha e fundit që kryeministri Kurti të ndalojë së përdoruri një gjuhë të tillë të nxitjes së urrejtjes ndaj medieve, që pastaj reflektohet dhe shumëfishohet nga shumë prej votuesve të tij”, vijon reagimi i AGK-së.

Organi që përfaqëson mediat në Kosovë thotë se në respektim të lirisë së medies dhe lirisë së shprehjes, gazetarët dhe mediet në Kosovë duhet të lejohen që të ushtrojnë punën e tyre për të mbajtur përgjegjëse qeverinë, pa u penguar dhe intimiduar nga pushteti./Telegrafi/