AAK e shqetësuar për mosliberalizimin, Tahiri: Çfarë do të thotë sot Lajçak – nuk mjafton vetëm të ndihet keq

Shefi i Grupit Parlamentar të AAK-së, Besnik Tahiri në një konferencë për media ka folur për çështjen e vizave.

Ai ka thënë se AAK e sheh me shqetësim të madh qasjen injoruese të BE-së ndaj Kosovës dhe trajtimin joserioz të këresës tonë të drejtë për lëvizje të lirë.

“Kushtet e parapara nga Komisioni Evropian janë përmbushur vite më parë. Si grup parlamentar i kemi dy pyetje për anëtarët e BE-së, a është kjo një politikë sanksionuese që po i bëhet Kosovës apo Kosova është peng i politikës së anëtarëve të unionit evropian”, ka thënë Tahiri.

Ai ka shtuar se është shqetësuese mosreagimi i Qeverisë së Kosovës karshi kësaj teme.

Lexo po ashtu Mosliberalizimi i vizave, Lajçak nis sot vizitën tre ditore në Kosovë

“Shohim mosreagim të Qeverisë ndaj kësaj teme. Mungesa e kundërshtimit nga Qeveria në raport me këtë temë është e habitshme, sa ishin në opozitë gjithmonë kanë kritikuar e sulmuar për këtë temë. Shihet që lobimi rus përmes Beogradit po ka ndikim”, ka thënë Tahiri.

Tahiri ka shtuar se do të iniciojnë një debat parlamentar dhe një rezolutë në mënyrë që këtë çështje ta adresojmë në nivelin më të lartë.

Ai ka shtuar se është pakuptimtë që Kosova të mos ketë liberalizim të vizave.

“Sot në vizitë do ta kemi edhe emisarin Lajçak. Pyetja shtrohet se çfarë do tu thotë ai zyrtarëve të Qeverisë dhe partive parlamentare për këtë temë. Nuk mjafton vetëm të ndihet keq që s’po ndodh por duhet të veprohet në këtë çështje”, tha Tahiri, duke shtuar se është e padrejtë të privohemi nga lëvizja e lirë. /Telegrafi/