39-vjeçari në Gjilan vdes pasi e zuri lisi

Një 39-vjeçar ka vdekur pasditen e sotme në fshatin Burincë e Gjilanit pas lëndimeve të marra nga rrëzimi i një lisi.

Lajmin për Telegrafin e ka konfirmuar zëdhënësi i Policisë së Kosovës për rajonin e Gjilanit, Ismet Hashani.

“Ju njoftomë se sot me datën 09.08.2022 rreth orës 16:53 kemi pranuar informatë se në fshatin Burincë – komuna Gjilan personin shqiptar shtetas i Kosovës  (1983) me vendbanim në komunë të Kaçanikut ishte duke prerë drunj, në një moment një lis e ka zënë duke i shkaktuar lëndime të rënda trupore”, ka thënë ai.

Vdekjen e viktimës e ka konfirmuar mjeku kujdestar, ndërsa trupi i pajetë do të dërgohet në Institutin e Mjekësisë Ligjore për obduksion.

“Nga lëndimet e marra rreth orës 18:00 mjeku kujdestar në vendin e ngjarjes ka konstatuar vdekjen e personit, janë njoftuar njësite relevante për t’u marrë me rastin. Me urdhër të prokurorit të shtetit kufoma do të dërgohet në IML”.

Tutje, Hashani ka bërë të ditur se rasti është duke u hetuar nga Policia e Kosovës, njësitet e hetimeve rajonale. /Telegrafi/