Zemaj e Tërnava flasin për menaxhimin e pandemisë COVID-19

Ministri i Shëndetësisë, Armend Zemaj vizitoi sot Bashkësinë Islame të Kosovës (BIK) ku u prit nga kreu i saj, Muftiu Naim Tërnava.

Ministri Zemaj në këtë takim është informuar nga kreu i BIK-ut për menaxhimin e deritanishëm nëpër xhamitë e Kosovës dhe zbatimin e masave kundër COVID-19.

Zemaj e falënderoi myftiun Tërnava për organizimin e besimtarëve në të gjitha xhamitë e Kosovës për të parandaluar përhapjen e COVID-19.

“Bashkëbiseduesit janë pajtuar që bashkëpunimi midis MSh dhe BIK t’i shërbejë ruajtjes së shëndetit dhe mirëqenies së popullatës së Kosovës”, thuhet në njoftimin e MSh-së.

Ndryshe, në fillim të këtij muaji BIK-u kishte marrë vendim për pezullimin e aktiviteteve fetare në të gjitha xhamitë, sikurse janë ligjëratat e tribunat fetare, pezullimin e mësimbesimit dhe shkollës verore nëpër xhami. Po ashtu, në të gjitha xhamitë në vend nuk lejohet të falen më shumë se 50 persona, u ndalohet imamëve të marrin pjesë në të pame, ndërsa duhet të bëhet shenjëzimi i vendeve se ku mund të falen besimtarët në xhami, ndërsa namazi i xhumasë të falët nga dy herë në xhamitë qendrore – varësisht nga nevoja.

Po ashtu, është marrë vendim që të gjithë besimtarët të mbajnë maskë gjatë faljeve të namazeve, të përdorin dezinfektues para shkuarjes në xhami dhe personat mbi 65-vjeç dhe ata nën 16-vjeç të falen në shtëpi. /Telegrafi/