Zelensky në samitin e NATO-s akuzon Rusinë për përdorimin e bombave me fosfor

Presidenti ukrainas, Volodymyr Zelensky akuzoi Rusinë për përdorimin e bombave me fosfor këtë mëngjes.

Këto komente Zelensky i bëri derisa foli në samitin e NATO-s përmes një video-lidhje.

“Përsëri, fëmijët po vdisnin, njerëzit po vdisnin”, i tha ai NATO-s.

Sidoqoftë, ai nuk ka asnjë provë ose nuk potencoi se ku ndodhi sulmi.

Zelensky thotë se ai ka kërkuar mbështetjen ajrore “për të ndihmuar në mbrojtjen e qiellit tonë”, që nga fillimi pasi Ukraina nuk ka mbrojtje të fuqishme kundërajrore.

Ai tha se Rusia po përdor armë të shkatërrimit në masë dhe se pasojat ishin të qarta.

“Ne jemi kushte të pabarabarta për më shumë se një muaj”, tha ai, duke bërë thirrje për mbështetje ushtarake pa kufizime për të shpëtuar njerëzit dhe qytetet e Ukrainës.

Presidenti ukrainas u shpreh se Rusia po përdor të gjithë arsenalin e saj pa kufi – duke vënë në cak qytete e banuara, spitalet dhe urat.

Deri më tani Ukraina nuk ka marrë asnjë avion të vetëm, thotë Zelensky. Ai gjithashtu thotë se ka bërë thirrje për tanke – “na jepni, na shisni” – por ende nuk ka marrë një përgjigje të qartë për këto nga anëtarët e NATO-s.

Zelensky gjithashtu pyeti anëtarët e aleancës nëse ishin të bindur se neni 5 i Traktatit të Atlantikut të Veriut do të funksiononte nëse Rusia do të sulmonte NATO-n. Neni 5 i Traktatit të Atlantikut të Veriut thotë se një sulm ndaj një vendi anëtar të NATO-s është sulm ndaj të gjithë NATO-s.

Dhe ai i bëri thirrje aleancës që të mos i deklarojë Ukrainës se ushtria e saj nuk i përmbush standardet e NATO-s:

“E vetmja gjë që kërkoj nga ju pas një muaji të tillë lufte është, ju lutem, mos na thoni kurrë se ushtria jonë nuk i përmbush standardet e NATO-s”.

Sot po mbahet samiti i NATO-s në Bruksel, ku janë mbledhur liderët e vendeve anëtare për të diskutuar për situatën në Ukrainë, dhe hapat e mëtejmë që kjo Aleancë do t’i ndërmerr për të parandaluar zgjerimin e konfliktit. /Telegrafi/