Zbulohen dy banesa me lëndë narkotike në Krujë, në kërkim babai me dy djemtë

Dy banesa në të cilat kultivohej lëndë narkotike janë zbuluar ditën e sotme në Krujë.

Policia bën me dije se në kërkim janë shpallur tre persona, babai me dy djemtë e tij, konkretisht Q. X., L. X. dhe K. X, të cilët kishin në ruajtje banesën e përshtatur për kultivim të bimëve narkotike.

Ndërkohë në kuadër të operacionit të koduar “Derveni”, janë sekuestruar 206 bimë narkotike, të kultivuara në vazo që u gjetën brenda 2 ambienteve të përshtatura me llamba.

“Në vijim të goditjeve të njëpasnjëshme të tentativave për kultivim të bimëve narkotike në ambiente të hapura e të mbyllura, dhe si rezultat i kontrollit të imtësishëm të territorit, mbështetur nga inteligjenca informative se në vendin e quajtur “Kodër Dushk”, në fshatin Derven, në banesën e një shtetasi që aktualisht jeton në Greqi, kultivoheshin bimë narkotike, është organizuar dhe finalizuar operacioni policor i koduar “Derveni”- njofton policia.

Gjithashtu personave të shpallur në kërkim, iu gjet dhe iu bllokua edhe një furgon brenda të cilit policia gjeti pajisje të shumta elektrike që do të shërbenin për përshtatjen e ambienteve të tjera të banesës, për kultivim të bimëve narkotike, me llamba.

Materialet procedurale i kaluan Prokurorisë pranë Gjykatës së Rrethit Gjyqësor Krujë, për veprime të mëtejshme. /Telegrafi/