Xhelal Sveçla nuk e konsideron të arratisur Enver Sekiraqën, i përgjigjet Faton Hajrizit

Ministri i Punëve të Brendshme, Xhelal Sveçla gjatë ditës ka qëndruar në Mitrovicën Veriore. Nga atje ai ka folur për rastet e arratisjeve nga sistemi i drejtësisë i tre të dënuarve për vepër penale të rënda, vrasje.

I arratisur nëntë herë nga burgjet e Kosovës, së fundmi disa ditë më parë, Faton Hajrizi tani po i çon porosi edhe të parit të Ministrisë së Brendshme, Xhelal Sveçla, që tha se është çështje orësh kur ai arrestohet.

“E pyes Sveçlën, ke punu në furrë a si është puna se i kishe do orë të furrigjisë. Nuk mundesh me me kapë ti mu, kurrë s’mundesh me me kap, o ministër i punëve të kota. Ata të cilët me kishin kap edhe me marrëveshje janë në Hagë atje, që ja kisha ngu hatrin, jo lepurushat e Vetëvendosjes, ju njohim mirë kush jeni”, deklaron Hajrizi nga arratia.

Hajrizi vazhdon të jetë i pa-qasshëm për institucionet e drejtësisë por ministri Sveçla i është përgjigjur atij në një deklaratë për TV Dukagjinin.

“Unë nuk e kapi askënd, janë institucionet që merren me ta”, ka deklaruar Sveçla.

Lexo po ashtu I arratisuri Faton Hajrizi shfaqet sërish në TikTok, ka një mesazh për ministrin Sveçla

Por, Faton Hajrizi është vetëm njëri nga tre persona me nam kohëve të fundit që janë arratisur nga sistemi i drejtësisë së Kosovës.

I dënuar me 25 vjet burgim për nxitje të vrasjes në arrati qe 57 ditë është edhe Enver Sekiraqa, e gjithashtu edhe Marko Roshiq, i dënuar në rastin e vrasjes së Ivanoviqit.

Atyre u ishte zëvendësuar masa e sigurisë nga mbrojtja në liri në paraburgim por nuk kanë arritur të kapen nga organet e sigurisë.

Por, për ministrin Sveçla ata nuk janë të arratisur.

“Nuk janë tre persona të arratisur, një është arratisur. Tjerët nuk janë paraqitur para drejtësisë kur është kërku prej tyre. Policia e kryen punën e vet. Nuk ka najfar telashe”, ka vijuar Sveçla.

Ndryshe, ministri i Punëve të Brendshme, Xhelal Svecla gjatë së premtes ka qëndruar në Mitrovicën Veriore bashkë me ministrin e Pushteti Lokal, Elbert Krasniqi e janë parë nën shoqërimin edhe të Agim Bahtirit e zëvendës komandantit të Policisë, Veton Elshani duke shijuar kafe e ushqim në këtë qytet.