Xhaferi për refuzimin e nismës së Apasievit për referendum: Ka përvojë si deputet, duhet t’i dijë rregullat

“Më falni tani, unë këtu nuk jam në konsultime për të dhënë këshilla se kush do të ketë mundësi, kush nuk do të ketë mundësi. Dispozita e nenit 135 është e qartë, precize se në çfarë baze duhet të rregullohet kërkesa”.

Kështu kryetari i Kuvendit, Talat Xhaferi komentoi sot përgjigjen e tij ndaj nismës së kryetarit të së “Majtës”, Dimitar Apasievit për referendumin mbi marrëveshjen me Bullgarinë.

Xhaferi tha se e njëjta është refuzuar për shkak se nuk është përpiluar në pajtim me dispozitat e Rregullores.

“Fillimisht parashtruesi i iniciativës ka eksperiencë dy vjeçare parlamentare si deputet. Shpresoj se e njeh dispozitën e nenit 135 nga Rregullorja e Kuvendit që e adresoj, ndërsa sa i takon përmbajtjes së pyetjes ajo është vetëm rikujtim, nuk është obligim i imi të hyj aty. Rikujtim se mënyra se si është bërë pyetja në procedurën e mëtejme mund të ketë përafërsisht problem, në kuptim të asaj që nuk e them unë, por institucionet tjera në shtet thonë se pyetjet e tilla nuk janë aspak akt juridik, kështu që vetëm rikujtoj deklaratat e institucioneve tjera, e jo që unë përzihem në atë pjesë”, tha mes tjerash Xhaferi.