Vrasja në Prizren, Prokuroria njofton se viktimat ishin të moshës 52 dhe 21 vjeç

Prokuroria Themelore në Prizren ka dhënë detaje të reja rreth vrasjes që ka ndodhur mbrëmë në Prizren, ku kanë mbetur të vdekur babë e vajzë.

Prokuroria njofton se babai ishte i moshës 52-vjeç dhe vajza 21-vjeçare, transmeton Telegrafi.

“Me datën 15.12.2020, rreth orës 19:30, jemi informuar nga Policia e Kosovës se në lagjen ‘Edit Durham’, në Prizren, në një shtëpi banimi janë gjetur dy trupa të pajetë, ku dyshohet se është përdorur arma e zjarrit. Viktimat janë familjarë në mes vete, janë babë e bijë, të moshës 52 vjeçare, përkatësisht 21 vjeçare, ku njëri nga viktimat është zyrtar policor, i policisë kufitare. Në vendin e ngjarjes është gjetur një armë e zjarrit e cila dyshohet se është arma zyrtare e policisë. Ngjarja ka ndodhur në ambient familjarë në prezencën e anëtarëve të familjes”, thuhet në njoftim.

Lexo po ashtu Babë e bijë vriten me armë zjarri në Prizren

Tutje në njoftim thuhet se në vendin e ngjarjes ka dalë prokurori kujdestar së bashku me njësitë relevante policore dhe zyrtarët e Inspektoratit Policor të Kosovës.

“Pas shikimit të vendit të ngjarjes, trupat e pajetë janë dërguar për obduksion në Institutin e Mjekësisë Ligjore në Prishtinë. Deri më tani nuk dihen rrethanat e rastit, mirëpo Prokuroria dhe Policia janë duke mbledhur informacionin e nevojshëm me qëllim të zbardhjes së rastit dhe rrethanave që kanë quar deri në ngjarjen tragjike”./Telegrafi/