Vlerat e vërteta të një Agjencie Reklamuese

Vatra është fjalë mjaft e dashur, pasi është sinonim i ngrohtësisë familjare, mbledhjeve rreth oxhakut, i kohës që kalojmë me njerëzit e zemrës, duke shërbyer kështu edhe si strehëz, por edhe si “çerdhe” për familjet shqiptare përgjatë historisë.

Agjencia Vatra e ka marrë këtë metaforë dhe e ka kthyer në një koncept të ri të kujdesit për bizneset, markat, institucionet dhe subjektet, në një botë dinamike ku marrëdhëniet dhe ndërlidhjet vijnë gjithnjë të parat.

Suksesin e kompanisë së tyre ndër vite ia atribuojnë dy elementeve kryesore:

Së pari, puna e tyre ka si pikë orientimi shkollën më të avancuar në krijimtari, komunikim dhe marrëdhënie me publikun, shkollën britanike, që konsiderohet si shkolla numër një e koncepteve estetike, si dhe e parimeve të reklamimit, marrëdhënieve me publikun dhe sjelljes së konsumatorit në ditët e sotme;

Së dyti, puna e tyre bazohet mbi faktin se, tek flasim, asnjë nuk mund ta perceptojë saktë imazhin e vet.
Andaj, nevojitet dikush tjetër për ta perceptuar, interpretuar, analizuar dhe për t’i dhënë jetë atij imazhi, ndonëse vendimin përfundimtar e merr gjithmonë klienti.

Kështu, suksesi i Vatrës është pasqyrë si e maturisë ekonomike dhe aktorëve institucionale, ashtu edhe e nevojës për të përdorur aftësinë krijuese, marrëdhëniet me publikun dhe marketingun e çdo lloji për të plotësuar kërkesat e sofistikuara të konsumatorit shqiptar, qofshin ato politike, ekonomike, apo të lidhura me ofrimin e shërbimeve e mallrave, sidomos në një kohë kur produkti ideohet, prodhohet dhe prezantohet në mënyra krejtësisht të reja.

Sot, vendimet e lidhura me menaxhimin dhe komunikimin shihen si dy anët e një monedhe. Siç e thotë edhe slogani “ajo që menaxhohet komunikohet dhe ajo që komunikohet menaxhohet”. Shkrirja dhe pajtueshmëria e plotë midis vendimeve të menaxhimit dhe vendimeve të komunikimit premton të ardhme të ndritur për agjencitë e marrëdhënieve me publikun, por në të njëjtën kohë “nxit” edhe konkurrencë të ashpër.

Vitet e njëpasnjëshme të suksesit tregojnë se Vatra ia ka dalë të krijojë partneritete fitimtare dhe është më se e përgatitur që t’i bëjë ballë sfidave të reja dhe t’i përgjigjet si duhet evolucionit të dyfishtë të shoqërisë shqiptare: nga njëra anë, ka shumë konsumatorë me gjithnjë e më tepër kërkesa dhe sjellje të rafinuara, dhe nga ana tjetër, aktorët kryesorë ekonomikë dhe institucionalë po bëhen gjithnjë e më tepër ambiciozë dhe aktivë në një treg dita-ditës më sfidues, jo vetëm për të tërhequr vëmendje, por çka është më e rëndësishmja, për të fituar besimin e konsumatorit.
Jo më kot Drejtori Ekzekutiv dhe Themeluesi thotë: -Së bashku, do të vijojmë t’u japim vlera të vërteta bizneseve dhe markave tuaja.