Viti në një fjalë: Mag7

Nga: Katie Martin / The Financial Times
Përkthimi: Telegrafi.com

Për një kohë të shkurtër në fillim të vitit 2023, tregjet e aksioneve u sollën ashtu siç presin investitorët e fiksuar pas recesionit: tmerrësisht keq.

Por, një fillim i zymtë ia hapi shpejt rrugën grumbullit të dominuar nga tufa e emrave mëdhenj të teknologjisë, të cilët pak a shumë bashkoheshin përmes temës së nxehtë të inteligjencës artificiale [AI]: Apple, Microsoft, Alphabet, Amazon, Tesla, Meta dhe Nvidia.

Nga qershori, pseudonimi i tyre “Shtatëshja e madhërishme” [Magnificent Seven] me të vërtetë nisi të ketë kuptim.

Disa elemente të rëndesës nga lartë janë tipare mjaft të zakonshme në aksionet amerikane, por Shtatëshja e madhërishme (ose Mag7 shkurt) këtë e ka çuar në ekstreme të reja.

Rreth mesit të vitit 2023, këto aksione u rritën nga 40 për qind në 180 për qind në çmim, duke e tërhequr indeksin standard S&P 500 të aksioneve amerikane me rreth 14 për qind dhe duke u cilësuar si një nga nismat më të forta të vitit gjatë dy dekadave. Megjithatë, pa Mag7-shin, indeksi ishte i sheshtë.

Që atëherë, është zgjeruar fuqia e tregut të aksioneve. Megjithatë, Charles Schwab llogarit se Mag7-shi ka fituar më shumë se 100 për qind në këtë vit dhe se në indeks përbëjnë një masë masive me rreth 30 për qind. Pa ta, S&P 500 është rritur me 11 për qind; me ta performanca dyfishohet. Madhësia e tyre tani është aq e theksuar sa nuk dominojnë vetëm aksionet amerikane, por gjithashtu një pjesë të madhe të performancës së tregjeve globale të aksioneve.

Investitorët thonë se kjo nuk është përsëritje e bumit fatkeq të dotcomit-it të vitit 1999. Përkundrazi, flukset hyrëse vijnë nga investitorë konservatorë që kërkojnë kompani që mund të përballojnë rënien, grumbullues të aksioneve të bindur për revolucionin e AI-së, përfituesit afatshkurtër që ndjekin aksionet e larta dhe gjurmuesit që ndjekin indeksin e gjerë të tregut.

Megjithatë, rreziku është se vetëm një skandal ose një lëvizje e stilolapsit të një rregullatori mund të godasë aksionet dhe të shkaktojë dhimbje tek investitorët – në mbarë botën. /Telegrafi/

Lexo po ashtu Viti në një fjalë: X

Lexo po ashtu Viti në një fjalë: LLM