Vetura, armë, para e villa në Brezovicë – policia tregon se çfarë u konfiskua tjetër pas gjetjes së 83 kilogramë heroinë në Han të Elezit

Policia e Kosovës përmes raportit 24 orësh ka dhënë detaje të tjera lidhur me konfiskimin e 83 kilogramë heroinë në pikën kufitare në Han të Elezit.

“Pas disa veprimeve operativo-hetimore gjatë një operacioni  policor nga Drejtoria për Hetimin e Trafikimit me Narkotik- Sektori Qendror, në bashkëpunim me Doganën e Kosovës në pikën kufitare në Hanë të Elezit është ndaluar një kamion me targa të Turqisë, gjatë kontrollit  në të janë gjete dhe sekuestruar 83 kg 592 gr substanca të dyshuara narkotike të cilat dyshohet të jenë heroinë”, thuhet në raportin e policisë.

Lexo po ashtu U gjetën 83 kilogramë drogë në mjet transportues në Han të Elezit, arrestohen shtatë persona - Prokuroria e Ferizajt jep detaje

Në këtë operacion janë arrestuar shtatë persona meshkuj gjashtë prej tyre kosovar dhe një shtetas i Turqisë, janë kontrolluar pesë lokacione të ndryshme.

“Lidhur me operacionin nga të dyshuarit janë sekuestruar: kamioni në të cilin janë gjetur substancat narkotike, një kombibus,  një veturë, dy armë zjarri me 5 fishekë, para të gatshme 11.630 euro, 55 dollarë, 670 dinar të Maqedonisë, 8250 lira turke, 12 telefona celularë, disa dokumente, ndërsa në proces të sekuestrimit janë edhe 12 vetura, një shtëpi dhe villa në Brezovicë”, thuhet në raport.

Të gjithë personat e dyshuar me vendim të prokurorit janë dërguar në mbajtje për 48 orë, rasti vazhdon të hetohet. /Telegrafi/