Vetëvendosje reagon pas publikimit të pamjeve të përleshjes mes Haki Abazit dhe Dardan Molliqajt

Vetëvendosje ka reaguar pas publikimit të pamjeve, ku shihet përplasja fizike, mes kandidatit për deputet nga VV-ja, Haki Abazi dhe zyrtarit të PSD-së, Dardan Molliqaj, përfshirë shoqëruesin e këtij të fundit.

Përmes një shkrimi në Facebook, Vetëvendosje thotë se Haki Abazi është sulmuar në mënyrë rrugaçërore, e nga prapa shpine.

“Ne e denoncojmë këtë krim, dhe konsiderojmë se këto imazhe e vulosin si njeri të dhunshëm e si mashtrues Dardan Molliqajn, i cili asokohe mohoi të ketë sulmuar fizikisht”, thuhet në reagimin e Lëvizjes Vetëvendosje.

VV-ja ka thënë se këto imazhe “vulosin si njeri të dhunshëm e si mashtrues Dardan Molliqajn”.

Kjo parti ka akuzuar edhe Rexhep Hotin e PDK-së për fshehje të vërtetës.

VV ka kërkuar nga AAK-ja, partnere e PSD-së, “të dënojë dhunën kriminale të Molliqajt”.

Lexo po ashtu Pamjet e rrahjes ndërmjet Dardan Molliqajt dhe Haki Abazit

Më 11 shtator, kandidati i VV-së për deputet, Haki Abazi, është sulmuar nga Dardan Molliqaj dhe shoqëruesi i tij.Sulmi fizik kishte ndodhur pas një emisioni televiziv në T7.

Reagimi i plotë i Vetëvendosjes

Pamjet e dala në një portal, tregojnë sulmin brutal ndaj kandidatit për deputet të Lëvizjes VETËVENDOSJE!, Haki Abazit, nga ana e kandidatit të AAK-së Dardan Molliqaj dhe truprojës së tij Fatos Sahitit. Ky sulm nga ana e dy personave, njëri prej të cilëve shihet duke vënë dorën në brez kërcënueshëm, vërteton atë që kemi thënë prej fillimit. Haki Abazi është sulmuar në mënyrë rrugaçërore, e nga prapa shpine.

Ne e denoncojmë këtë krim, dhe konsiderojmë se këto imazhe e vulosin si njeri të dhunshëm e si mashtrues Dardan Molliqajn, i cili asokohe mohoi të ketë sulmuar fizikisht. Po ashtu, del se edhe Rexhep Hoti e paska fshehur të vërtetën, meqenëse dukshëm ishte dëshmitar i këtij sulmi. Të dyja partitë duhet të distancohen nga këta kandidatë, AAK duhet të dënojë dhunën kriminale të Molliqajt, e PDK-ja duhet të dënojë mashtrimin publik nga ana e Rexhep Hotit. Në të njëjtën kohë, jemi të zhgënjyer nga mosveprimi i prokurorisë, e cila i ka patur në dorë këto filmime.

Lëvizja VETËVENDOSJE! kërkon nga policia e prokuroria të marrin masa tash që e vërteta doli në shesh. Prokuroria duhet të kërkojë arrestimin e Molliqajt, i cili e ka sulmuar një person vetëm pse nuk pajtohet politikisht me të. Njëkohësisht media duhet të mos i jape hapësirë këtyre dhunuesve e mashtruesve flagrantë.