Veseli fton shqiptarët në Mal të Zi të dalin në zgjedhje

Kryetari i Partisë Demokratike të Kosovës, Kadri Veseli iu ka bërë thirrje shqiptarëve në Mal të Zi që të dalin të votojnë më 30 gusht, në zgjedhjet që do të mbahen në këtë shtet.

Veseli përmes një postimi në rrjetin social në Facebook ka shkruar se shqiptarët duhet të kenë besim tek forca e votës si dhe tek proceset demokratike, si rruga e vetme për të realizuar të drejtat dhe interesin kombëtar.

Sipas tij, shqiptarët në Mal të Zi, janë faktor konstruktiv, të cilën e kanë dëshmuar siç tha ai me përkrahjen e referendumit të pavarësisë, hyrjen në NATO dhe në të gjitha proceset demokratike.

“Me afrimin e datës 30 gusht, ditës së zgjedhjeve parlamentare në Mal të Zi, dëshiroj të ftoj të gjithë bashkëkombësit tanë shqiptarë që të dalin në votim dhe të votojnë partitë shqiptare. Shqiptarët duhet të kenë besim tek forca e votës si dhe tek proceset demokratike, si rruga e vetme e duhur për të realizuar të drejtat dhe interesat kombëtare. Po ashtu, duke votuar listat shqiptare, ata forcojnë peshën e tyre për të ndikuar vendim-marrjen e këtij shteti, në mënyrë që të përmbushen kërkesat e tyre legjitime. Bashkëkombësit tanë në Mal të Zi, janë faktor i vyer konstruktiv, gjë që e kanë dëshmuar me përkrahjen e referendumit të pavarësisë, e hyrjes në NATO dhe të gjitha proceseve e reformave demokratizuese të këtij shteti mik. Forcimi i zëri të shqiptarëve në institucionet shtetërore të Malit të Zi, është në dobi edhe të vetë këtij shteti fqinj, sepse shqiptarët kudo ku jetojnë e mbajnë të palëkundur orientimin euro-atlantik dhe mbështesin pa kursim forcimin e liberal demokracisë dhe bashkëjetesës në diversitet”, ka shkruar Veseli në Facebook. /Telegrafi/