Profesoresha e fakultetit të Arteve, Besa Luzha, ka reaguar ndaj ministres së Integrimeve Evropiane, Dhurata Hoxha e cila ka thënë se nuk është e vërtetë që kjo ministri ka kërkuar nga Bashkimi Evropian ridestinimim e mjeteve financiare të parapara për ndërtimin e sallës së koncerteve në Prishtinë.

Luzha përmes një statusi në rrjetin social në Facebook ka thënë se ministrja Hoxha ka kërkuar ri-destinimin duke thënë që lokacioni ka probleme pronësore-juridike, gjë që sipas saj nuk është e vërtetë.

Ajo në disa pika sqaron se tek kush qëndron problemi për ridestinimin e mjeteve financiare të parapara për ndërtimin e sallës së koncerteve, në Prishtinë.

Pas reagimit të komunitetit të artistëve pamorë dhe me lobim:

-Ministri i Kulturës e ka vënë në listën e objekteve të përkohshme të mbrojtura.

-Komuna është angazhu me gjetë lokacione të tjera sipas kritereve të BE.

-Kryeministri Haradinaj i ka kërku Ministrit me e largu nga lista që me i hapë rrugë ndërtimit

-Nga Lista objektin e heq vetëm Këshilli , anëtarët e të cilit duhet të votohen në Kuvendin e Kosovës.

-Kuvendi ka dështu me e qitë në agjendë këtë çështje , se ashtu kështu spo ka forum as për çështje ma urgjente.

-Komisioni Evropian, natyrshëm ka insistu me u përfundu përzgjedhja e lokacionit.

-Të gjithë akterët e përfshirë kanë dështu me qenë agjil në këtë situatë.

-Ministrja Hoxha, krye në veti ka dërgu letër për ri-destinim.

e tash….topi te kush?”, ka sqaruar Luzha në një postim të saj në Facebook.

Ndërkaq, kryetari i komunës së Prishtinës, Shpend Ahmeti, ka reaguar për ridestinimin e fondeve të Bashkimit Evropian për sallën koncertale në Prishtinë, ku ka thënë se Ministria e Integrimeve krye në vete i ka dërguar letër BE-së për ridestinimin e 15 milion eurove të fondit IPA 2019, të cilën e ka mohuar ministrja e MIE-së, Dhurata Hoxha.

Hoxha ka thënë se kjo Ministri nuk është institucioni që bën ridestinimin e mjeteve të BE, prandaj sipas tyre nuk është e vërtetë që MIE ka kërkuar nga BE ridestinimim e mjeteve financiare të parapara për ndërtimin e sallës së koncerteve.

Sipas reagimit kjo Ministri i ka dërguar shkresë Kryetarit Ahmeti duke i kërkuar që t’i informojë për gjendjen mbi lokacionin e sallës së koncerteve. Ndërsa sipas tyre Ahmeti, nuk është përgjigjur asnjëherë në kërkesën që i është bërë.

Ndryshe në emisionin “Përballje” në tetor të vitit të kaluar është diskutuar për ndërtimin e sallës koncertale në Prishtinë, si dhe për problemi me ndërtimin e kësaj salle, dhe për mundësinë e humbjes së donacionit Bashkimi Evropian prej 15.4 milionë euro për këtë sallë koncertale. /Telegrafi/