Ukraina fillon ndërtimin e bazave nëntokësore për strehimin e aeroplanëve luftarak amerikanë F-16

Forcat Ajrore të Ukrainës kanë njoftuar se kanë filluar ndërtimin e bazave nëntokësore dhe bunkerëve për të pranuar aeroplanët luftarak F-16 nga SHBA-ja.

Majori dhe zëdhënësi i Forcave Ajrore të Ukrainës, Ilya Yevlash, tha se planet e Ukrainës për të siguruar aeroplanin e shumëkërkuar po zhvillohen me kujdes.

Mirëpo, bëhet e ditur se sigurimi i tyre kërkon kosto të konsiderueshme, duke përfshirë strehimore nëntokësore, shkruan Business Insider, përcjell Telegrafi.

Gjithashtu, Yevlash tha se aeroplanët do të shpërndahen në baza të ndryshme, duke ia bërë të vështirë kështu Rusisë zbulimin e tyre.

Siç raportohet, F-16 do t’i bashkohen ushtrisë ukrainase gjatë verës dhe do t’ia mundësojnë asaj të kryejë më shumë sulme kundër Rusisë.

Lexo po ashtu Pse SHBA-ja bleu 81 aeroplanë të vjetër sovjetikë nga Kazakistani?

Ndryshe, Ukraina ka kërkuar të furnizohet me F-16 nga SHBA-ja që nga fillimi i pushtimit në shkallë të plotë në shkurt të vitit 2022.

Por, ky lloj mjeti ushtarak kërkon pista të standardeve të larta, andaj ushtria ukrainase do t’i përdorë edhe bazat ajrore perëndimore për strehimin e tyre.

E ky avancim i Ukrainës nuk u prit mirë nga presidenti rus, Vladimir Putin, i cili ka paralajmëruar se çdo bazë ajrore perëndimore që strehon F-16 për Ukrainën do të jetë në shënjestër të forcave të tij të armatosura. /Telegrafi/