Toyota nuk dorëzohet: Tani po eksperimenton me një teknologji tjetër që do të mbante gjallë veturat me benzinë, hibride

Prodhuesi japonez i automjeteve duket se ka goditur në vend. Toyota nuk u nxitua me tranzicionin elektrik dhe ngadalësimi i tregut të veturave elektrike tregon se ishte vendimi i duhur.

Kohët e fundit, ajo madje investon fonde të caktuara në zhvillimin e teknologjive të reja të motorëve me djegie të brendshme. Toyota përshtati motorin me benzinë që të funksionojë me hidrogjen, dhe tani i shtoi një filtër të njëjtit motor që mbledh dioksid karboni (CO2) gjatë vozitjes. Ky filtër mund të përdoret edhe në benzinë ose hibride.

Toyota aktualisht po eksperimenton me këtë koncept në veturën e saj të garave GR Corolla me hidrogjen. Testet fillestare tregojnë se kjo risi mund t’i bëjë makinat e saj negative CO2, jo vetëm neutrale. Prandaj, ata do të eliminonin më shumë CO2 nga atmosfera sesa prodhojnë.

Teknologjia është e zgjuar sepse nuk kërkon energji shtesë. Filtrat në pjesën e përparme të veturës mbledhin dioksid karboni gjatë vozitjes, dhe më pas nxehtësia e mbetur nga motori përdoret për ta tretur atë në një lëng që mund të hidhet. Kjo do të thotë se kjo teknologji mund të funksionojë edhe në motorë të tjerë me djegie të brendshme, jo vetëm në ato që punojnë me hidrogjen.

Në vizionin e Toyota-s, kjo do të krijonte një automjet që në fakt pastron ajrin gjatë vozitjes. Fatkeqësisht, ka ende shumë sfida përpara prodhimit serial. Në provë, filtrat mblodhën vetëm 20 gram dioksid karboni në 20 xhiro (91 km) në pistën e provës.

Kjo është ende e vogël, sepse edhe makinat e qytetit me motorë benzinë lëshojnë rreth 100 g/km CO2. Filtrat më të mëdhenj mund të thithin më shumë dioksid karboni, por ndoshta do të ishte e vështirë të futeshin në automjetet e pasagjerëve. Megjithatë, aplikimi i tyre në automjetet komerciale mund të lehtësojë avancimin e kësaj teknologjie.

Ende nuk dihet se çfarë të bëhet me lëngun që përmban CO2. Gjithashtu filtrat duhen ndërruar shpesh, gjë që nuk është praktike… Do të shohim nëse Toyota arrin diçka me këtë teknologji. /Telegrafi/