Presidenti Hashim Thaçi ka thënë se lufta e Ushtrisë Çlirimtare të Kosovës ka qenë dhe do të mbetet përjetësisht e pastër dhe e drejtë.

Thaçi përmes një postimi në rrjetin e tij social Facebook, ka shkruar se Jakup Krasniqi e shumë anëtarë të tjerë të Shtabit të Përgjithshëm që janë ftuar nga Gjykata Speciale, e kanë mbrojtur popullin duke luftuar armikun në çlirimin e vendit.

Sipas tij, asnjë gjykatë, as vendore, as ndërkombëtare, nuk mund ta njollos atë.

“Lufta e Ushtrisë Çlirimtare të Kosovës ka qenë dhe do të mbetet përjetësisht e pastër dhe e drejtë. Asnjë gjykatë, as vendore, as ndërkombëtare, nuk mund ta njollos atë. Me Jakup Krasniqin, me anëtarët e tjerë të Shtabit të Përgjithshëm, komandantët e zonave dhe ushtarët që janë ftuar nga Gjykata Speciale, ne e kemi mbrojtur popullin dhe e kemi luftuar armikun deri në çlirimin e vendit tonë. Si president i vendit, si bashkëluftëtar, e çmoj shumë gatishmërinë e të gjithëve që të bashkëpunojnë me drejtësinë. Duke bashkëpunuar me drejtësinë ndihmojmë që të ngadhënjejë e vërteta për luftën tonë çlirimtare. Jam i bindur që, njëjtë sikurse në të kaluarën, sërish do të dalim fitimtarë. Pastërtia e luftës sonë do të dëshmohet përballë çdo gjykate”, ka shkruar Thaçi në Facebook.

Ndryshe, Gjykata Speciale i ka bërë ftesë për intervistim kryeministrit të Kosovës, Ramush Haradinaj, këshilltarit të presidentit, Bislim Zyrapi si dhe ish-anëtar dhe zëdhënës i Shtabit të Përgjithshëm të UÇK-së, Jakup Krasniqi. /Telegrafi/