Të shtëna me armë zjarri në Shtime, plagoset një person

Një person ka mbetur i plagosur si pasojë e të shtënave me armë zjarri  që kanë ndodhur sot në Shtime, ndërsa policia ka arrestuar edhe një të dyshuar të përfshirë në incident.

Lajmin e  ka konfirmuar zëdhënësi i Policisë në Rajonin e Ferizajt, Agim Gashi, sipas të cilit rasti ka ndodhur rreth orës 16:40.

Ai gjithashtu ka bërë të ditur se policia ka gjetur dhe konfiskuar edhe një armë e zjarrit që dyshohet se është përdorë, por nuk ka dhënë detaje rreth motiveve të mundshme të këtij rasti.

“Sot rreth orës 16:40 në një lokal afarist në Shtime, policia ka marrë informata për gjuajtje me armë zjarri. Policia ka dalë në vendin e ngjarjes, ku nga dëshmitarët ka kuptuar se një person është dërguar nga qytetarët në ambulancën në Shtime dhe pas ndihmës së parë është dërguar në QKUK në Prishtinë. Sipas mjekëve kujdestar i njëjti ka plagë në këmbë dhe ndodhet jashtë rrezikut për jetë. Policia menjëherë është vënë në ndjekje të personit të dyshuar dhe i njëjti është arrestuar. Është gjetur dhe konfiskuar një armë e zjarrit, më të cilën dyshohet se është kryer vepra”, ka thënë Gashi.

Për më tepër, ai ka bërë të ditur se te personi i dyshuar është vërejtur se ka një lëndim në dorë dhe se i njëjti është dërguar për trajtim mjekësor në ambulancën në Shtime.

“Në vendin e ngjarjes kanë dalë njësitet e specializuara, të cilat janë duke marrë informata për ndriçimin e rastit”, ka thënë Gashi./Telegrafi/