Të martën protestohet për Kosovën në Bruksel

Të martën, më 20 shkurt në ora 13:00 do të organizohet protestë paqësore për Kosovën në Bruksel.

Në një njoftim për media të dërguar nga Nusret Pllana thuhet se me këtë protestë kërkohet liberalizimi i vizave për Kosovën, njohja nga pesë shtetet e BE-së, etj.

“Bashkatdhetarë të nderuar të Belgjikës, të Evropës e më gjerë, Kosova dhe kombi ynë ka nevojë për bijtë dhe bijat e veta. Për 10 vjetorin e Kosovës si shtet, me një iniciativë të Profesorit Nusret Pllana, në kuadër të dorëzimit 751 eurodeputetëve dhe 28 eurokomisionerëve të librit të tij ‘Terrori i Serbisë Pushtuese mbi Shqiptarët  1844-1999’, do të mbahet një protestë paqësore përpara Parlamentit evropian”, thuhet në njoftim.

Në këtë protestë do të kërkohet: Liberalizim i vizave për banorët e Kosovës pa kushtin e demarkacionit; njohje nga 5 shtetet evropiane (Spanjë, Sllovaki, Qipro, Greqi dhe Rumani) të pavarësisë së Kosovës; kushtëzimi i njohjes së Pavarësisë së Kosovës nga Serbia për vazhdimin e integrimit evropian dhe që të gjithë shtetet e Ballkanit perëndimor të bëhen pjesë të BE-së në të njëjtën kohë. /Telegrafi/